Muzeu i Louvreit shtrenjton biletat për vizitorët jashtë BE-së

Prej 14 janarit të vitit të ardhshëm, vizitorët që nuk janë pjesë e Zonës Ekonomike Evropiane do ta paguajnë hyrjen 45 për qind më shumë, për ta ndihmuar financimin e planit ambicioz për rinovim

Ndonëse turistët që e vizitojnë Muzeun e Louvreit në Paris veçse janë pajtuar me pritjet e gjata, galeritë e stërmbushura dhe nganjëherë edhe me hajdutët që vjedhin thesare nga korridoret e saj, tani disa prej tyre do të përballen edhe me rritje të konsiderueshme çmimesh.

Të enjten, bordi i Louvreit është pajtuar për t’i rritur çmimet 45 për qind për vizitorët që nuk i përkasin Zonës Ekonomike Evropiane, duke përfshirë amerikanët. Krejt kjo për arsye të përpjekjes për rritje fondesh, për ta ripërtërirë institucionin me telashe. Prej 14 janarit, turistët do të paguajnë 32 euro, në vend se të paguanin 22 euro, për t’i shëtitur korridoret e Louvreit dhe për ta admiruar “Mona Lisan”. Vizitorët nga Britania dhe Rusia po ashtu do të paguajnë më shumë, meqenëse nuk janë pjesë e Zonës Ekonomike Evropiane, e cila përfshin shtetet e Bashkimit Evropian, si dhe Islandën, Lihtenshtajnin dhe Norvegjinë.

Ndryshimet janë konfirmuar përmes një e-maili nga një zëdhënës i Louvreit. Muzeu është ende në rikuperim pasi hajdutët kishin thyer një prej galerive të tij në tetor dhe kishin vjedhur bizhuteri në vlerë prej 100 milionë dollarësh. Vjedhja e turpshme, e cila kishte ndodhur gjatë ditës derisa muzeu ishte hapur, kishte vënë në pah dobësitë e sigurisë së Louvreit dhe infrastrukturën jokualitative.

Për janar presidenti i Francës, Emmanuel Macron dhe drejtori i Louvreit, Laurence des Cars, me qëllim të ripërtëritjes së muzeut, kanë lajmëruar një plan të quajtur “Louvre – Rilindja e Re”, duke përfshirë edhe zhvendosjen e “Mona Lisas” në një hapësirë të re ekspozimi, për t’iu shmangur turmave. Plani gjithashtu synon përmirësimin e sigurisë dhe rinovimin e qindra dhomave të ndërtesës, me kulmet pikuese dhe sistemet e prishura të ftohjes dhe nxehjes.

Mirëpo ai plan do të kushtojë rreth 1.1 miliard euro, sipas “Cour des Comptes”, instituti më i lartë auditiv në Francë, i cili ka dhënë detaje në një auditim të detajuar për projektin e publikuar këtë muaj. Ndryshimi i çmimeve të biletave pritet të nxjerrë përfitime prej 20 milionë eurosh në vit, ka thënë zëdhënësi i muzeut.

Louvrei nuk është muzeu i vetëm francez që ka probleme me zgjidhjen e pagesave për ta përmirësuar infrastrukturën. Emilie Girard, presidente e degës franceze të Këshillit Ndërkombëtar të Muzeve, një organizatë që përfaqëson muzetë, ka thënë në një intervistë se të gjithë muzetë në vend ishin “në një udhëkryq” për shkak të rritjes së kostove dhe se duhej të vendosnin nëse do t’ua rritnin tarifat vizitorëve apo do të kursenin para me masa të tjera, si për shembull “shkurtimi i orareve”. Nuk kishte përgjigje të lehta, ka shtuar Girard.

Ideja për t’iu kërkuar disa vizitorëve ndërkombëtarë të paguajnë më shumë për të vizituar atraksionet më të mëdha kulturore të Francës është propozuar për herë të parë para një viti nga Rachida Dati, ministrja franceze e Kulturës, në një intervistë për “Le Figaro”, gazetë ditore franceze.

“A është normale, për shembull, që një vizitor francez të paguajë të njëjtin çmim hyrjeje në Louvre si një vizitor brazilian apo kinez?”, kishte pyetur ajo. “Nuk pritet që francezët t’i paguajnë të gjitha vetë”.

Rreth një e katërta e vizitorëve të Louvreit janë francezë, ndërsa pjesa tjetër vjen nga e gjithë bota, kryesisht nga Shtetet e Bashkuara, Kina dhe vende të tjera evropiane. Ai ka tërhequr 8.7 milionë vizitorë në vitin 2024, sipas një deklarate të publikuar në janar, nga të cilët 77 për qind ishin të huaj.

Për disa vizitorë amerikanë të muzeve, ideja që vizitorët nga jashtë qytetit të paguajnë më shumë për hyrjen në muze mund të duket e drejtë. Muzeu Metropolitan i New Yorkut, për shembull, u lejon banorëve të New Yorkut të paguajnë sa të duan për bileta, duke shmangur tarifën e rregullt prej 30 dollarësh. Dhe këtë javë, administrata Trump ka njoftuar se nga 1 janari, turistët e huaj do të paguajnë një shtesë prej 100 dollarësh për t’i vizituar parqet kombëtare më të njohura të vendit.

Megjithatë, në Francë, ideja e çmimeve të diferencuara ka shkaktuar polemika, me sindikata që kanë dalë kundër planit. Seksioni i Louvreit i sindikatës “C.F.D.T.-Culture” ka thënë në një deklaratë se vendimi është “tronditës”.

Louvrei po krijonte një situatë “absurde dhe të padrejtë”, ku, për shembull, “njerëzit nga Lindja e Mesme do të paguajnë një çmim më të lartë për të parë vepra themelore dhe simbolike të kulturës së tyre” sesa vizitorët francezë, është shkruar në deklaratën e sindikatës. “Publiku që po synoni do ta përjetojë këtë si diskriminim”.

Një zëdhënës i “C.G.T.”-së, një tjetër sindikatë që përfaqëson punonjësit e Louvreit, ka thënë në një deklaratë se është gjithashtu kundër ndryshimeve në çmimet e biletave, duke theksuar se kjo është pjesë e një “komercializimi të kulturës” dhe se nuk u takon vizitorëve të huaj “t’i pastrojnë” problemet e shumta të Louvreit, përfshirë çështjet e sigurisë.

Louvrei nuk është i vetmi muze që pritet të prezantojë çmime të diferencuara në janar. Pallati i Versajës, shtëpia e operës “Palais Garnier” dhe “Château de Chambord”, një kështjellë e epokës së Rilindjes në Loire, janë ndër atraksionet që këtë vit kanë shqyrtuar rritjen e çmimit të disa prej biletave të tyre për vizitorë ndërkombëtarë.

Një zëdhënëse e Pallatit të Versajës ka thënë në një e-mail se, nga 14 janari, vizitorët joevropianë do të paguajnë 3 euro më shumë për biletë sesa vizitorët evropianë. Një biletë që jep qasje në të gjithë pallatin dhe ambientet e tij gjatë sezonit të lartë veror, për shembull, do të kushtonte 35 euro, nga 32 euro sa ishte më parë.

Atraksionet e tjera nuk u janë përgjigjur kërkesave për koment.