“Lopa e macchiatos” e Surroit, me mbi 600 kopje të shitura në ditën e parë të Panairit

Prishtinë, 7 qershor – Libri i ri i shkrimtarit, publicistit e politikanit Veton Surroi qysh në ditën e parë të panairit të librit “Prishtina 2018” ka qenë vepra më e kërkuar nga lexuesit. Me mbi 600 kopje të shitura, “Lopa e macchiatos”, që gjendet tek shtandi i Botimeve KOHA, del të jetë më i kërkuari në fillim të ngjarjes më të madhe të librit në Kosovë.

“Vepra e re e Veton Surroit udhëheq sa u përket librave të kërkuar. Por, pa dyshim, që në ditën e parë kemi qenë shtandi më i vizituar. Shkak i pranisë së madhe të lexuesve në shtandin tonë janë titujt ekskluzivë, si dhe çmimet tejet të favorshme deri në 70 për qind zbritje”, ka thënë Fidan Imeri, menaxher i shitjes në Grupin KOHA.

Botimet KOHA këtë vit sjell tetë tituj të rinj në Panair, tetë të tjerë që janë botuar midis dy panaireve dhe gjithsej 150 tituj. “Ridënimi” nga Fatos Lubonja, vëllimi i pestë i “Monument” me autor Artan Krasniqi, “Vegim” nga Ardian Haxhaj, “Vet’ e katërdhjeta” me autore Drenusha Zajmi-Hoxha, “Naltësimi i Iskanderit” nga Benjamin Disraeli”, “Shqiptarët dhe unë” me autor Jovan Nikolljadis dhe “Gratë e huaja për shqiptarët dhe shqiptarët e diasporës”, përmbledhur dhe përpunuar nga Hanëmshahe Ilazi, bëjnë pjesë në titujt e rinj të Botimeve KOHA.