Kim Yutani: Të mos e harrojmë “Zgjoin” për “Oscars”

Kuratorja e programit të filmave në “Sundance Film Festival”, Kim Yutani, i ka dalë në përkrahje kandidatit të Kosovës për “Oscars 2022”.

“Të mos e harrojmë ‘Zgjoin’”, ka shkruar ajo duke treguar se filmi vitin e kaluar ishte në mesin e të shpërblyerve në “Sundance Film Festival”.

Yutani bashkë me shkrimin e saj kishte shpërndarë postim e “Zeitgeist Film”, rrjet që ka të drejtat për shpërndarje të filmit në kinema. Aty shkruan se “Zgjoi” vitin e kaluar bëri histori duke marrë tri çmimet kryesore në kategorinë “World Cinema”. Ishte fitues i çmimit për regjinë më të mirë dhe mori edhe çmimin e jurisë e atë të audiencës.

“Tani ‘Zgjoi’ ka shanse të mëdha që të bëhet kandidati i parë i Kosovës që arrin të jetë në mesin e të nominuarve në kategorinë për filmin më të mirë ndërkombëtar”, vazhdon tutje shkrimi i “Zeitgeist Film”.