“Më shumë se balancë dhe fërkim” vjen me udhëtim në dimensione të ndryshme kohore, me ndërrim rolesh dhe abstraksion në art.
Në hapësirën e modifikuar të “Stacionit” u ekspozua vepra më e fundit e Meriton Malokut, fitues i “Artistët e së nesërmes” vite më parë, raporton “Express” i KTV-së.
Një piramidë e krijuar nga letrat e lojës dhe një ekran ku shfaqej bashkëveprimi dhe lidhja mes një prindi dhe të birit, paraqitën bashkëpunimin dhe njëkohësisht, ndërrimin e roleve, përderisa në disa skena shihej prindi duke e udhëhequr të birin, e më vonë e kundërta.
Ndërrimi i roleve që shihej në ekran, paraqet një përmbysje të një rendi të caktuar në momentin që fëmija fillon të udhëheqë dhe mësojë babanë e tij.
Nga shumë të pranishëm, ky interaksion u cilësua si i trishtë dhe nostalgjik.
Arti bashkëkohor ka tendencë të ndihet dhe të prekë ndryshe të pranishmit, gjë që edhe u arrit gjatë kësaj ekspozite.
“Më shumë se Balancë dhe Fërkim” është pjesë e programit vjetor të ekspozitave të Stacion- Qendra për Art Bashkëkohor Prishtinë dhe modul i çmimit “Artistët e së nesërmes”.