Busti i hyjneshës Venus në Spanjë nxjerr të dhëna të reja arkeologjike

Një bust mermeri që besohet se paraqet hyjneshën romake Venus, u zbulua gjatë punimeve të rizhvillimit që po zhvillohen në plazhin “La Almadraba në Spanjë”, njoftoi Këshilli Bashkiak i Alicantes.

Venusi, dhe homologia e saj greke, Afërdita, konsiderohen shpesh në mitologji si “nëna” e Romës, pasi ajo paraqitet si nëna e heroit trojan Ene, të cilin Virgjili e përshkroi si paraardhës të Romulit dhe Remit, themeluesve të Romës.

Me një model flokësh të frymëzuar nga periudha helenistike, me flokë të valëzuar të mbledhur pas dhe të ndarë në mes, busti përputhet me paraqitjen klasike të Venusit, shpjegoi José Manuel Pérez Burgo, drejtues i Departamentit të Trashëgimisë së Integruar në Këshillin Bashkiak të Alicantes.

“Kronologjia”, tregoi Burgo, “duke pritur ende një raport më të detajuar, si nga pikëpamja stilistike ashtu edhe nga konteksti, do ta vendoste atë midis shekujve I dhe II pas Krishtit”.

Busti gjithashtu ngjan me skulpturat që zakonisht vendoseshin mbi piedestale në shtëpitë e shtresës së lartë të Romës së lashtë, shpjegoi këshilltarja për kulturën e Alicantes, Nayma Beldjilali.
Ai është një “kokë romake me cilësi të lartë artistike dhe në gjendje të shkëlqyer ruajtjeje, e cila, sipas specialistëve”, tregoi Beldjilali, duke theksuar rëndësinë e zbulimit si një nga “gjetjet më të rëndësishme të një skulpture romake në të gjithë historinë e Alicantes dhe provincës së saj”.

Sipas deklaratës së këshillit, sondazhe arkeologjike në këtë zonë janë kryer që nga viti 2009, si pjesë e projektit të rizhvillimit të La Almadrabës.

Gjatë këtyre gërmimeve të sondave, arkeologët kanë zbuluar themelet e shtëpive dhe dhomave që i përkisnin një vile romake, e përdorur nga shekulli III para Krishtit deri në shekullin IV pas Krishtit.
Pranë themeleve të vilës së lashtë u gjetën gjithashtu fragmente qeramike të ruajtura mirë dhe monedha romake.

Gërmimet e mëtejshme dhe analizat ende po përfundohen nga kompania “Arpa Patrimonio”, nën mbikëqyrjen e Departamentit të Trashëgimisë së Integruar të bashkisë.

Kohët e fundit, në mbarë botën janë zbuluar disa statuja dhe paraqitje të Venusit (ose Afërditës), si edhe të hyjnive të tjera të panteonit grek dhe romak.

Javën e kaluar, Ministria Egjiptiane e Turizmit dhe Antikiteteve njoftoi se kishte zbuluar një kokë të ngjashme mermeri, pjesë e një statuje të Afërditës, gjatë gërmimeve në Ihnasya Al Madinah.

Ashtu si busti i zbuluar në Alicante, koka e mermerit e gjetur në Egjipt kishte flokë kaçurrela dhe tipare fytyre që të kujtonin ato të përdorura për të paraqitur hyjnitë dhe figurat e shquara.

Në fillim të majit, arkeologët në Aleksandri të Egjiptit zbuluan disa statuja të hyjnive greke dhe romake, përfshirë Bakun (perëndia romake e verës dhe festimeve), Asklepin (perëndia greke e mjekësisë) dhe një statujë pa kokë që besohet se paraqet perëndeshën romake të urtësisë, Minervën.

Statujat u gjetën së bashku me artefakte të tjera, përfshirë monedha, llamba, enë qeramike dhe fragmente amforash, të zbuluara në vendin arkeologjik.

Në mënyrë të ngjashme, në prill, gjatë gërmimeve në qytetin antik Laodicea mbi lumin Lykos, pranë Denizlit, u zbulua një statujë e Athinës, perëndeshës greke të luftës dhe urtësisë.

Me një lartësi prej afërsisht dy metrash dhe pa kokë, statuja u gjet e rrëzuar me fytyrë poshtë në rrënojat përgjatë fasadës së jashtme të ndërtesës së skenës së Teatrit Perëndimor të Laodicesë.

E punuar tërësisht nga mermeri i bardhë, Athina paraqitet e veshur me një peplos pa mëngë dhe me një mantel (hylamis) rreth qafës. Në kraharorin e saj ndodhet egjida e famshme, e zbukuruar me kokën e Meduzës të mbuluar me gjarpërinj.

Bazuar në stilin artistik të statujës, arkeologët e kanë datuar atë në kohën e sundimit të perandorit të parë romak, Augustit, i cili sundoi nga viti 27 para Krishtit deri në vitin 14 pas Krishtit.

Ndërsa pjesa e pasme e statujës mendohet të jetë lënë e ashpër dhe e sapoliruar për shkak të vendosjes së saj midis kolonave të teatrit, mjeshtëria e treguar në punimin e veshjeve të Athinës tregon se ajo është krijuar nga duart e një skulptori shumë të aftë.

(Marrë nga The Jerusalem Post)