Kulturë

“Zgjoi” i kthehet Kosovës si festë suksesesh e shans për “Oscar”

Regjisorja Blerta Basholli dhe presidentja e Kosovës, Vjosa Osmani, të premten mbrëma në “Cineplexx”, në gala-shfaqjen e filmit “Zgjoi”

Kur kanë mbetur fiks edhe dy muaj deri te lajmi nëse do të vazhdojë rrugëtimin drejt çmimit më të madh, “Zgjoi” i Kosovës i është rikthyer vendit. Një gala-shfaqje ka organizuar Presidenca të premten mbrëma. Projektorët e “Cineplexxit” tashmë janë gati ta shfaqin për publikun e gjerë. Festë suksesesh të deritanishme e përkrahje, e ka cilësuar presidentja Vjosa Osmani këtë organizim. “Një film që s’të lë të marrësh frymë”, ka thënë kryeministri Albin Kurti. Sipas regjisores së filmit, është rast historik për Kosovën. “Rast më të mirë për të depërtuar e për t’u nominuar në ‘Oscars’ s’kemi pasur”, ka thënë Blerta Basholli. Aty kanë qenë edhe Fahrija Hoti, ajo që e inspiroi jo vetëm filmin, sikurse edhe Yllka Gashi që e portretizon mjeshtërisht gruan stoike

 

Kur kanë mbetur fiks edhe dy muaj deri te lajmi nëse do të vazhdojë rrugëtimin drejt çmimit më të madh, “Zgjoi” i Kosovës i është rikthyer vendit. Një gala-shfaqje ka organizuar Presidenca të premten mbrëma. Projektorët e “Cineplexxit” tashmë janë gati ta shfaqin për publikun e gjerë. Festë suksesesh të deritanishme e përkrahje, e ka cilësuar presidentja Vjosa Osmani këtë organizim. “Një film që s’të lë të marrësh frymë”, ka thënë kryeministri Albin Kurti. Sipas regjisores së filmit, është rast historik për Kosovën. “Rast më të mirë për të depërtuar e për t’u nominuar në ‘Oscars’ s’kemi pasur”, ka thënë Blerta Basholli. Aty kanë qenë edhe Fahrija Hoti, ajo që e inspiroi jo vetëm filmin, sikurse edhe Yllka Gashi që e portretizon mjeshtërisht gruan stoike

Mbi supet e saj rëndon dhimbja e humbjes së më të dashurit, bashkëshortit. Madje humbja s’ka as definim, sepse nuk dihet nëse ndonjëherë rikthimi, qoftë edhe si mbetje mortore, do t’i trokasë në derë. Me gjakftohtësinë e shprehësisë emocionale, por me vullkane ndjesish përbrenda, Fahrije Hoti bëhet ikonë e të qenit stoike përballë çdo sfide, paragjykimi e linçimi shoqëror të mentalitetit patriarkal. Për të nuk ka ndarje punësh, por ajo flet përmes veprave të saj. Historinë e bujshme, duke qenë kryeprotagonistja e aktivizimit të grave të Krushës dhe rebelimit të tyre kundër pritjes, e solli në tri sallat e kinemave të “Cineplexxit” në Prishtinë mbrëmjen e së premtes jetësimi i rolit nga Yllka Gashi në filmin e metrazhit të gjatë, i cili ka arritur të shënojë histori ndërkombëtare me 12 çmime të dëshmuara – “Zgjoi”.

Në ceremoninë e organizuar nga Presidenca e Kosovës – “Zgjoi” i rikthehet publikut vendas pas premierës kombëtare në festivalin “PriFest” në gushtin e sivjetmë dhe një shfaqjeje në fillim të këtij muaji në “Femart”. Ka ardhur me tapet të kuq për ekipin e me përkrahje për rrugëtimin e mëtutjeshëm deri te çmimi më i madh në botën e filmit. Lista e ngushtë me 15 filma, për atë që njihet si kategoria ndërkombëtare, do të publikohet më 21 dhjetor. Festë suksesesh të deritanishme e përkrahje e ka cilësuar presidentja Vjosa Osmani gala-mbrëmjen e organizuar për filmin. “Një film që s’të lë të marrësh frymë”, ka thënë kryeministri Albin Kurti. Të dy e kanë takuar edhe fizikisht, atë që ia dha rrëfimin “Zgjoit” – Fahrije Hotin.