Policia e Kosovës ka njoftuar se një motoçiklist i cili të premten e javës që shkoi ishte aksidentuar me një çiklist në Pejë, ka vdekur në Qendrën Klinike Universitare të Prishtinës (QKUK), ku ishte duke u trajtuar.
“Raportohet se kishte ndodhur një aksident trafiku me lëndime të rënda trupore në mes të një motoçiklete dhe një çiklisti me drejtues m/k. Si pasojë e lëndimeve të marra të dy drejtuesit kishin pranuar tretman mjekësor në QKUK. Më 30.06.2025 nga QKUK-ja është pranuar informatë se drejtuesi i motoçikletës si pasojë e lëndimeve të rënda në aksident kishte ndërruar jetë”, thuhet në raportin 24-orësh të Policisë.
Me vendim të prokurorit, trupi i pajetë thuhet se është dërguar në Institutin e Mjekësisë Ligjore për obduksion.
