Shtetasin turk e regjistroi paligjshëm si të Kosovës, ndalohet ish-ofiqari në Ferizaj

Prokuroria Themelore në Ferizaj ka njoftuar se është ndaluar për 48 orë ish-zyrtari i Gjendjes Civile në Komunën e Ferizajt, B.Xh., nën dyshimin se një shtetas turk e kishte regjistruar paligjshëm si shtetas të Kosovës.

B.Xh. akuzohet për “keqpërdorim të pozitës apo autoritetit zyrtar” dhe “falsifikim të dokumentit zyrtar”.

“Sipas informatave të para, dyshohet se i njëjti duke keqpërdorur detyrën zyrtare, ka regjistruar një shtetas të Republikës së Turqisë në librat e gjendjes Civile me dokument të falsifikuar si shtetas të Republikës së Kosovës me vendbanim në Ferizaj”, thuhet nga Prokuroria Themelore në Ferizaj.

Për rastin ka njoftuar edhe Policia e Kosovës.

Ajo ka thënë se i dyshuari B.Xh. (1967) që kishte punuar si ofiqar në Gjendje Civile në Ferizaj deri në vitin 2019, ka regjistruar një shtetas turk në sistemin elektronik të gjendjes civile, pa i plotësuar kriteret.

“Shtetasi turk ka arritur që pas regjistrimit të pajiset me letërnjoftim të Republikës së Kosovës dhe me pasaportë të Republikës së Kosovës. I dyshuari, me veprimin e tij dyshohet të ketë kryer veprën penale ‘keqpërdorimi i pozitës apo autoritetit zyrtar’. I njëjti, sot më 20.09.2023, është intervistuar në cilësi të të dyshuarit, në prezencë të avokatit mbrojtës dhe pas intervistimit, me aktvendim të lëshuar nga prokurori, i dyshuari dërgohet në ndalim prej 48 orësh”, thuhet nga Policia e Kosovës.