Një përleshje fizike mes katër të rinjve ka ndodhur në rrugën “Zahir Pajaziti” në Podujevë të premten pasdite, si pasojë e një mosmarrëveshjeje të mëhershme në rrjetet sociale.
Sipas raportit 24-orësh, Policia ka arrestuar një të mitur, i cili dyshohet se ka tentuar t’i godasë me thikë tre persona të tjerë të përfshirë në rrahje. Sulmi ka dështuar dhe nuk ka të lënduar.
Gjatë kontrollit, njësitë policore kanë konfiskuar një thikë dhe një sprej në posedim të të dyshuarit të mitur.
Me vendim të prokurorit, ai është ndaluar për 24 orë, ndërsa tre personat e tjerë janë intervistuar dhe më pas janë liruar në procedurë të rregullt.
