Prokuroria: I dyshuar për vrasjen e gruas shtatzënë në Malishevë është bashkëshorti i saj

(Tekst i përditësuar) - Prokuroria Themelore në Gjakovë ka njoftuar se i dyshuar lidhur me rastin e vrasjes e gruas në Malishevë, është bashkëshorti i saj, i cili ka mbetur i plagosur.

Ka njoftuar se sipas të dhënave fillestare një person i gjinisë femërore, bashkëshortja e personit të dyshuar, si pasojë e plagëve nga arma e zjarrit ka ndërruar jetë në QKUK.

 Ndërkaq, i dyshuari personi i gjinisë mashkullore, po ashtu ka pësuar plagë të rënda nga arma e zjarrit, i cili është dërguar për trajtim mjekësor dhe sipas njoftimit nga QKUK, i njëjti është në gjendje të rëndë dhe kritike për jetën.

 “Prokurori i Shtetit, ka dal në vendin e ngjarjes dhe me urdhër të prokurorit, trupi i pajetë i viktimës është dërguar në Institutin e Mjekësisë Ligjore (IML) në Prishtinë, për kryerjen e autopsi”, thuhet në njoftim.

Nga Prokurori i Shtetit rasti është iniciuar për veprat penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve”.

Edhe Kronikë 24 gus 2026 Një grua shtatzënë vdiq pas plagosjes me armë zjarri në Malishevë, burri në gjendje të rëndë

Prokurori i Shtetit, në koordinim me Policinë e Kosovës, është duke ndërmarrë të gjitha veprimet e nevojshme me qëllim të ndriçimit të plotë të rrethanave të këtij rasti dhe sigurimit të provave relevante.

Familjarët e viktimës kanë njoftuar përmes rrjeteve sociale, se ajo do të varroset sot (24 gusht) në orën 18 në varrezat e lagjes Foniqi në fshatin Llazicë të Malishevës.