Operacion antidrogë në Itali, arrestohen 18 persona, grupi kryesohej nga disa shqiptarë

Një operacion i madh antidrogë është zhvilluar mëngjesin e kësaj të marte në Itali, ku kanë rënë në pranga 18 persona.

Sipas mediave italiane operacioni, i quajtur “Metalba”, për të cilin janë angazhuar në terren 100 karabinierë është zhvilluar në provincat: Matera, Potenza, Cosenza, Leçe, Udine, Parma dhe Trapani. Mes 18 urdhërarresteve që janë lëshuar, 7 persona do të qëndrojnë në burg dhe 11 të tjerë në arrest shtëpie, ndërsa vijojnë hetimet nëse ka persona të tjerë të përfshirë.

Personat e arrestuar akuzohen si pjesë e një organizate kriminale, që trafikonte dhe tregtonte droga të forta, kryesisht heroinë dhe kokainë, ndërkohë që dyshohet se një pjesë e saj e vinte nga Shqipëria.

Sakaq, mediat nuk japin detaje sa i takon identitetit të personave që janë vënë në pranga, dhe as rolet specifike që ata kanë pasur në këtë organizatë.