Gjykata Themelore në Gjakovë ka aprovuar kërkesën e Prokurorisë, për caktimin e masës së paraburgimit prej një muaj për të pandehurin Y.V., për shkak të dyshimit të bazuar se ka kryer dhunë në familje.
Siç raportohet, më 20 tetor, i dyshuari ka ushtruar dhunë ndaj nënës, motrës dhe vëllait të tij për shkak të një mosmarrëveshjeje.
“Në ditën kritike për shkak të një mosmarrëveshje, i pandehuri revoltohet dhe e godet nënën e tij me shuplakë në fytyrë e me pas e godet edhe motrën pasi e njëjta kishte ndërhyrë për t’i ndarë, derisa aty kishte ardhur vëllai i tij duke e larguar nga të dëmtuarat, dhe pasi që i njëjti ishte larguar nga aty i pandehuri i drejtohet vëllait me fjalët se ‘kur vjen në shtëpi do të të mbys’, me çka tek të dëmtuarit ka shkaktuar frikë dhe shqetësim emocional”, thuhet në komunikatë.
Gjyqtari i procedurës paraprake Driton Sadiku, ka vlerësuar se janë përmbushur kushtet ligjore për caktimin e masës së paraburgimit për të pandehurin në fjalë, ngase me gjetjen e mundshëm të të pandehurit në liri, ekziston mundësia reale që i njëjti të pengojë në rrjedhën e procedurës penale duke ndikuar te të dëmtuarit, apo duke e përsëritur veprën penale.
I pandehur do të mbahet në paraburgim në kohëzgjatje prej një muaji, i cili do të llogaritet prej kohës së arrestimit më 21 tetor dhe do të zgjasë deri më 20 nëntor.