Një grua 65-vjeçare është viktima që u gjet në lumin Lumbardh në Rugovë gjatë së dielës dhe se hetimet për shkaqet e rrethanat e vdekjes po vazhdojnë.
Të dielën, zëdhënësi i policisë për rajonin e Pejës, Fadil Gashi, konfirmoi se ekipet dolën në vendin e ngjarjes pas lajmit se në lumin Lumbardh një person është gjetur i shtrirë pa shenja jete.
“Policia është njoftuar se në kilometrin e pestë të rrugës Pejë–Rugovë, te kthesa e madhe, poshtë në lum ku është Lumbardhi, një person është gjetur i shtrirë pa shenja jete. Njësitet policore kanë dalë menjëherë në vendngjarje, së bashku me zjarrfikësit dhe emergjencën. Mjeku kujdestar ka konstatuar vdekjen e personit”, ka deklaruar Gashi.
Me urdhër të prokurorit, trupi i pajetë u dërgua në Institutin e Mjekësisë Ligjore për obduksion.