Gjykata Themelore në Gjakovë ua ka caktuar nga një muaj paraburgim tre të pandehurve me inicialet A.F., K.N. dhe L.B., për shkak të dyshimit se kanë kryer veprën penale të blerjes dhe shitjes së paautorizuar të narkotikëve.
Caktimi i paraburgimit u vendos të martën me kërkesë të Prokurorisë.
Sipas kërkesës, më 2 tetor 2022 rreth orës 13:30, në pikën kufitare “Qafë Prush”, të pandehurve në bagazhin e automjetit të tyre u është gjetur një thes i mbushur me substancë narkotike që dyshohet të jetë e llojit marihuanë, me peshë 3.452 kg.
“Gjykata, pas shqyrtimit të shkresave të lëndës, ka konsideruar se janë përmbushur kushtet ligjore për caktimin e masës së paraburgimit ndaj tre të pandehurve, pasi caktimi i masave tjera alternative do të ishin të pamjaftueshme për zhvillimin me sukses të procedurës penale”, thuhet në vendimin e Gjykatës të martën.
