Policia e Shtetit ka finalizuar ekstradimin nga Emiratet e Bashkuara Arabe të Florenc Çapjes, 44 vjeç, një nga personat më të kërkuar ndërkombëtarisht nga drejtësia shqiptare. Ai mbërriti në aeroportin ndërkombëtar “Nënë Tereza” rreth orës 17:00 të premten.
Çapja ndodhej në Dubai qe gati tetë vjet ku jetonte i pashqetësuar. Pas ekstradimit, ai do të vendoset në një burg të sigurisë së lartë në Shqipëri për të vuajtur dënimin me burgim të përjetshëm.
44-vjeçari Florenc Çapja është nipi i Ardian Çapjas, i cili ishte kreu i një grupi të njohur kriminal në qytetin e Elbasanit, që po ashtu është në burg.
Florenc Çapja është i dyshuar për një sërë veprash penale, mes tyre porosi vrasjeje dhe përfshirje në aktivitete kriminale që shtrihen përtej kufijve të Shqipërisë.
Florenc Çapja dhe xhaxhai i tij Ardian Çapja janë dënuar me burgim të përjetshëm për akuzën e vrasjes së Nezir e Gentian Beqirit babë e bir në banesën e tyre në Elbasan në vitin 2012. Sipas vendimit të gjykatës, ata porositën vrasjen e tyre.
