Dy të mitur në Gjilan arrestohen nën dyshimin për keqpërdorim të kartelave bankare

Dy të mitur janë arrestuar te enjten në Gjilan, të dyshuar për mashtrim dhe keqpërdorim të kartelave bankare.

Më 8 dhjetor është iniciuar vepër fillestare hetimore ndaj të dyshuarve për veprën penale “Lëshimi i çeqeve pa mbulese ose të rreme dhe keqpërdorimi i kartelave bankare apo kreditit”, ndërsa tri ditë më vonë janë kryer kontrolle në dy lokacione të ndara, ku gjatë kontrollit janë siguruar prova përmes të cilave është forcuar baza e dyshimit se të dy të dyshuarit kanë kryer këtë vepër, si dhe “Mashtrimi” dhe “Shpërdorimi i pasurisë”.

“Gjatë zhvillimit të procedurave hetimore janë siguruar prova të besueshme se dy të dyshuar të mitur për një periudhe kohore, dyshohet se përmes mashtrimit kanë keqpërdorur të dhëna bankare të disa qytetarëve me qëllim përfitimi material të kundërligjshëm”, thuhet në njoftim.

Të dy të dyshuarit pas arrestimit janë intervistuar në bazë të procedurave ligjore. 

Me vendim të prokurorit të shtetit, ata janë dërguar në mbajtje për 24 orë.