Dogana e Kosovës ka njoftuar se në operacionin ku u konfiskuan 250 kilogramë kanabis në Prishtinë ka qenë e përfshirë edhe Agjencia e Kosovës për Inteligjencë.
Në një komunikatë për media ku janë dhënë detaje për aksionin, Dogana ka njoftuar se operacioni është bazuar mbi inteligjencën e siguruar nga AKI-ja.
Sipas Doganës substanca narkotike e llojit kanabis ka qenë e fshehur me kujdes në një automjet transportues.
“Operacioni është realizuar gjatë orëve të pasdites, kur njësia e Antikontrabandës e Doganës ka ndalur për kontroll një kamion që po lëvizte në drejtim të Prishtinës në autostradën ‘Ibrahim Rugova’. Pas një inspektimi të detajuar, dhe duke përdorur pajisjet profesionale të dhuruara nga Ambasada e Shteteve të Bashkuara të Amerikës, zyrtarët doganorë kanë arritur të demontojnë panelet e fshehura të automjetit, ku ishin vendosur substancat narkotike”, thuhet në njoftim.
Në vendngjarje thuhet se kanë dalë edhe njësia antidrogë e Policisë së Kosovës dhe prokurorja kompetente. Personi përgjegjës thuhet se është arrestuar nga Policia e Kosovës, ndërsa procedurat ligjore janë në zhvillim.