Dënohen me 12 vjet e 6 muaj burgim dhe 25 mijë euro dy persona për narkotikë

Gjykata Themelore në Ferizaj ka shpallur aktgjykim dënues ndaj të pandehurit A.R shtetas i Kosovës dhe shtetas i Maqedonisë dhe S.A. shtetas i Kosovës, të akuzuar për veprën penale të kryer në bashkëkryerje “blerja, posedimi, shpërndarja dhe shitja e pa autorizuar e narkotikëve, substancave psikotrope dhe analoge”.

I pandehuri A.R është dënuar me burgim në kohëzgjatje prej gjashtë vjet e gjashtë muaj, dhe dënim me gjobë në shumë prej pesëmbëdhjetë mijë euro; të pandehurit S.A. me burgim në kohëzgjatje prej gjashtë vjet dhe dënim me gjobë në shumë prej dhjetëmijë euro.

“Gjykata konform dispozitave të KPRK-së, konfiskon në mënyrë të përhershme njëmbëdhjetë pako me lëndë narkotike të llojit heroinë me peshë neto të përgjithshme 5432.88 gram dhe vetura e tij e markës ‘Wolsfagen Golf’”, thuhet në komunikatë.

Të pandehurit akuzohen se më 8 tetor 2020 në Ferizaj, kanë poseduar pa autorizim me qëllim të shitjes substancës narkotike të llojit heroinë, në atë mënyrë që pas marrëveshjes mes tyre i pandehuri A.E lëndën narkotike e ka siguruar nga persona të panjohur në Maqedoni, pas kësaj e ka sjellë tek një restorant në Ferizaj, ku është takuar me të pandehurin S.A, i cili e ka vendosur në veturën e tij të markës “Wolsfagen Golf”, të cilën e ka dërguar në një depo në oborrin e shtëpisë së vëllait të tij, ndërsa gjatë zbatimit të urdhër kontrollit nga Njësiti Antidrogë, me ç` rast kanë gjetur një çantë në të cilën ishin të vendosura 11 pako me lëndë narkotike të llojit heroinë me pesë neto të përgjithshme 5432.88 gram, e cila është sekuestruar nga policia, ka njoftuar Gjykata.