Arrestohet një person, tentoi të lidhë kontratë në noteri për shitblerje të pronës rreth 800,000 euro

Hetues të Policisë së Kosovës nga Njësiti Rajonal për Hetimin e Krimeve Ekonomike dhe Korrupsionit në Prishtinë pas veprimeve hetimore-operative dhe në bashkëpunim me autoritetet kompetente kanë arritur të sigurojnë informata në lidhje me aktivitet kriminal.

Sipas njoftimit të Policisë, dyshohet se personi i dyshuar me iniciale Sh.B. ka falsifikuar dokumentin (Aktin Noterial “Autorizimin” për shitblerje të pronës në vlerë rreth 800,000 kinse i njëjti dokument është noterizuar nga një Noteri në Prizren dhe me Autorizim të falsifikuar ka tentuar të lidh kontratë te një Noteri tjetër në Prishtinë, për shitblerjen e pronës në vlerë rreth 800,000 euro me blerësin (viktimën) me iniciale (A.H).

Pas verifikim dhe kontaktit me kompetentët është konstatuar që bëhet fjalë për një Autorizim të falsifikuar, me ç ‘rast janë vënë në dijeni autoritetet për veprimet e dyshuara si të kundërligjshme.

Hetuesit policor për Hetimin e Krimeve Ekonomike dhe Korrupsionit në rajonin e Prishtinës kanë konfirmuar se prona e cila ka qenë objekt i shit-blerjes (është në pronësi të dikujt tjetër dhe jo të personit që ceket në Autorizimin e falsifikuar) dhe me këtë dëshmohet dyshimi i kryerjes së veprës penale.

“Më këto veprime i dyshuari me iniciale (Sh. B.) dyshohet se ka kryer veprat penale: ‘Mashtrim’ dhe ‘Falsifikimi i dokumenteve’”, thuhet në komunikatë.

I dyshuari është shoqëruar në Polici dhe është dërguar në mbajtje 48 orë për procedura të mëtejme hetimore.