Arrestohet një person në Shtime që shtiu me armë në një aheng familjar

Autoritetet policore e kanë arrestuar një person në fshatin Petrovë të Shtimes pasi ka shtënë me armë zjarri në një aheng familjar.

Policia njoftoi të dielën se 33-vjeçari me inicialet G.R., pronar i një ahengut, është dërguar në mbajtje për 48 orë, derisa është intervistuar në prani të avokatit.

“Patrulla policore ka dalë menjëherë në vendin e ngjarjes dhe ka kontaktuar me pronarin e ahengut, i cili ka pranuar se kishte shtënë me një armë zjarri. Personi i dyshuar, G.R., 33 vjeç, është shoqëruar në stacionin policor në Shtime, ku është intervistuar në prani të avokatit. Lidhur me rastin është njoftuar prokurori i shtetit, i cili ka urdhëruar që i dyshuari të ndalohet për 48 orë”, thuhet në njoftimin policor në Facebook

Policia ka shkruar se përdorimi i armëve të zjarrit në ahengje apo tubime përbën rrezik serioz për jetën dhe sigurinë e qytetarëve.

“Policia Rajonale e Ferizajt rikujton se përdorimi i armëve të zjarrit, në veçanti gjatë ahengjeve apo tubimeve familjare, përbën rrezik serioz për jetën dhe sigurinë e qytetarëve. Apelojmë tek të gjithë qytetarët që të shmangin veprime të tilla të kundërligjshme dhe të bashkëpunojnë me policinë për të parandaluar rastet që mund të rezultojnë me pasoja të rënda”, thuhet në njoftimin policor.