Aktakuzë ndaj tre personave, dyshohen se lëshuan dokumente të rreme për patentë shoferë

Prokuroria Themelore në Prizren ka ngritur aktakuzë kundër tre personave të dyshuar për përfshirje në veprime të kundërligjshme që lidhen me lëshimin e certifikatave mjekësore dhe dokumenteve për patentë shoferë.

Sipas aktakuzës, i pandehuri L.B., në cilësinë e drejtorit të poliklinikës “G.” në Prizren dhe person i licencuar nga Ministria e Shëndetësisë për lëshimin e certifikatave mjekësore, dyshohet se më 15 korrik 2023 ka tejkaluar autorizimet e tij zyrtare duke lëshuar certifikata mjekësore të rreme për kandidatët B.V. dhe B.Th., pa i kontrolluar personalisht. 

Hetimet kanë zbuluar se në kohën kur janë lëshuar certifikatat, kandidatët ndodheshin jashtë Kosovës.
Këto certifikata u përdorën për regjistrimin e tyre në autoshkollat “S.” në Prizren dhe “F.” në Malishevë, duke u mundësuar pjesëmarrjen në procesin për marrjen e patentës së shoferit.

Për këto veprime, L.B. akuzohet për “Keqpërdorim të pozitës apo autoritetit zyrtar”.

Ndërsa, të pandehurit U.M. dhe I.G., në cilësinë e përfaqësuesve të këtyre autoshkollave, akuzohen se kanë përpiluar dhe dorëzuar dokumente të rreme, përfshirë kontrata dhe dëshmi pjesëmarrjeje në ligjërata, për kandidatët që në fakt ndodheshin jashtë vendit.

Edhe Arbëri 23 tet 2026 Prokuroria: Me dokument fals, u synuan dy kontrata për barna esenciale

Ata ngarkohen me veprën penale “Legalizimi i përmbajtjes së rreme”.

Prokuroria i ka propozuar gjykatës që, pas shqyrtimit gjyqësor dhe administrimit të provave, të pandehurit të shpallen fajtorë dhe të dënohen sipas ligjit.