Prokuroria Themelore në Mitrovicë ka ngritur aktakuzë ndaj L.S. B.H. V.I. dhe V.S. për veprat penale "vrasje e rëndë", "vrasje e rëndë në tentativë", "mbajtje në pronësi, kontroll ose posedim i paautorizuar i armëve" dhe "përdorim i armës apo mjetit të rrezikshëm".
Sipas njoftimit të Prokurorisë, më 12 shkurt të këtij viti, L.S. e kishte vrarë M.K. pas një mosmarrëveshjeje mes punëtorëve dhe një pronari të një lokali.
"Vjen një konflikt mes pjesëmarrësve të dy grupeve, me ç'rast i pandehuri L.S. nxjerr pistoletën dhe shtie në viktimën M.K. i cili vdes si pasojë e plagëve të marra, dhe predhat e godasin edhe B.H. duke i shkaktuar lëndime të rënda trupore", thuhet në njoftim.
Me këto veprime i pandehuri L.S., ka kryer veprat penale “Vrasja e rëndë”, dhe “Mbajtja në pronësi, kontroll, ose posedim të paautorizuar të armëve”, nga neni 366 paragrafi 1 të Kodit Penal të Republikës së Kosovës (KPRK)”, thuhet në njoftim.
Në rast të njëjtë, i pandehuri B.H. në rrugën “Bislim Bajgora” në Mitrovicë kishte shtënë me armë në drejtim të F.S. duke i shkaktuar lëndime të rënda trupore.
Edhe
Aktakuzë ndaj një personi në Pejë për vrasje të rëndë në tentativë
“I pandehuri V.I., datë 12 shkurt 2021, rreth orës 22 e 17 minuta në rrugën ‘Bislim Bajgora’ në Mitrovicë ka poseduar në kundërshtim me ligjin e zbatueshëm pistoletën e cila i është sekuestruar nga policia, e po ashtu në mënyrë kërcënuese ka përdorur pistoletën të cilën e kishte në posedim”, thuhet në njoftimin e Prokurorisë. Ndaj tij është iniciuar vepra penale “mbajtje në pronësi, kontroll ose posedim i paautorizuar i armëve”.
Edhe i pandehuri V.S. është akuzuar për veprën e njëjtë, ku dyshohet se në rast të njëjtë kishte përdorur armën ndaj punëtorëve të lokalit në fjalë.
