U përkujtua masakra e tregut në Mitrovicë

U përkujtua masakra e tregut në Mitrovicë

13 mars 2018 15:38

Janë përkujtuar viktimat e masakrës së tregut në Mitrovicë, që ndodhi 19 vjet më parë në tregun kryesor në qendër të qytetit të Mitrovicës, kur forcat serbe sulmuan me minahedhës, ndërsa tregu ishte përplot me njerëz.

Si pasojë e hedhjes së granatës, në treg mbetën të vdekur gjashtë persona, në mesin e të cilëve kishte fëmijë dhe gra, ndërsa që lëndime të rënda dhe të lehta morën 128 shqiptarë.

Përfaqësues të institucioneve komunale me në krye Faruk Mujka, nënkryetar i komunës, përfaqësues të institucioneve e asociacioneve të tjera, familjarë të martirëve dhe familjarë të viktimave u tubuan të martën në vendin e ngjarjes për të nderuar viktimat dhe për të kujtuar këtë ditë.

Mujka, para të pranishmëve tha se ajo ditë ishte e llahtarshme në Mitrovicë, pasi që në tërë tregun shiheshin viktimat e vdekura e të plagosura, ndërkohë që gjaku mbulonte hapësirat e tregut.

“Shumë prej të plagosurve kanë mbetur invalidë të përjetshëm, ndërsa një numër i konsideruar i tyre mbajnë proteza edhe sot në gjymtyrë. Kjo ditë nuk do të harrohet asnjëherë, por do të kujtohet përgjithmonë në mënyrë që gjeneratave të reja tu tregohet se çka ka qenë në gjendje të bëjë armiku ndaj popullit tonë të pafajshëm”, tha ndër të tjera Mujka.

Në vendin e ngjarjes, ku 19 vite më parë kishte ndodhur atentati, folën edhe Sabedin Uka dhe Azem Beqiri, të cilët kishin pësuar rëndë nga ky sulm sepse u ishin dëmtuar këmbët, duart e pjesë tjera të trupit.

Ata kërkuan nga institucionet e shtetit që të bëjnë më shumë për ta, pasi jeta e tyre është mjaft e rëndë.

© KOHA. Të gjitha të drejtat janë të rezervuara.

Komentet

Shto koment

Të ngjashme