1 perditesime
15:50

Muharremaj: Gjendja me zjarret është e rëndë në Suharekë

Të hënën vatrat e zjarreve kanë kapluar fshatrat Gjinovc, Studençan, Bukosh dhe Reçan të Suharekës, si dhe Zonën Industriale në këtë komunë.

I pari i Suharekës, Bali Muharremaj, thotë se gjendja është e rëndë teksa tregon se për të sanuar gjendjen në teren kanë dalë edhe qytetarët.

Ai bënë të ditur se të gjitha ekipet e zjarrfikësve janë në teren, teksa shton se kanë kërkuar ndihmë edhe nga komuna e Prizrenit dhe ajo e Mamushës.

“Gjendja është e rëndë, jemi në teren momentalisht me krejt ekipet e zjarrfikësve. Kemi zjarr në Gjinovc, në Studençan, në Bukosh, në Zonë Industriale e në Reçan, kështu që jemi duke e bërë maksimumin”, deklaroi ai.

Muharremaj deklaroi se nuk kanë kapacitete të mjaftueshme për shuarjen e zjarrit, sidomos tani që janë shtuar vatrat.

“Jo nuk kemi, sidomos kur i ke 5-6 vatra të zjarrit dhe është e pamundshme me pas (kapacitete). E thirra Mamushën, tash veç janë duke mbërri, ka edhe në Prizren por e kemi problem për të sanuar gjendjen. Numri i vogël i komunave, kanë nevojë të gjitha komunat, është teren që është problem me e përfshi sepse kemi shumë vatra, nuk e kemi vetëm një”, thotë Muharremaj. /KP

14:05

Vatrat e zjarreve kthehen sërish në Suharekë

Kryetari i Suharekës, Bali Muharremaj, ka njoftuar se vatrat e zjarreve në këtë mot të nxehtë janë rikthyer sërish në komunën që ai drejton.

Në Zonën Industriale në Shirokë dhe në fshatin Reçan, vatrat e zjarreve kanë shpërthyer në toka malore.

Zjarrëfikësit po përpiqen ta qetësojnë gjendje, teksa Muharremaj ka postuar disa video nga ky aksion.

Suhareka edhe ditën e djeshme pati vatra të zjarreve në vende të ndryshme.