Vëllezërit nga Peja, kultivues të Deltarit ilir

Edicioni i parë i emisionit “Jeta” për vitin 2022 vjen nga qyteti i Pejës.

Janë vëllezërit Ardian e Adnan Goska që prej vitesh janë kultivues të racës autoktone të Deltarit Ilir.

Dyshja kujton të ketë mbetur si traditë e kahershme e familjes së tyre kultivimi i Deltarit Ilir si racë e pastër e trojeve shqiptare.

Në shtëpinë e tyre, vëllezërit nga Peja, ua kanë krijuar një hapësirë qenve të kësaj race.

I vazhdueshëm është apeli i Ardian e Adnan Goskës drejtuar kultivuesve të tjerë, që këtë racë të mos e përziejnë me asnjë tjetër pasi që sipas tyre, humb origjinaliteti i Deltarit.

“Parametrat fizikë të Deltarit Ilir arrihen nëse nuk përzihet kjo racë me ndonjë racë tjetër. Vetëm ngjyra e tyre mund të dallohet, por tipi si tip është i njëjti. Në momentin që përzihet me raca të huaja, atëherë Deltarit Ilir i humbet shkëlqimi”, thekson Ardian Goska.

Edhe SOT 26 nën 2021 Djathi tradicional nga rrethina e Pejës

Ardiani shprehet se luftojnë që Deltari Ilir të mbetet racë e pastër, derisa thonë se shumë kultivues gabojnë kur duan t’i zhvillojnë më tepër sesa parametrat normalë të një Deltari.

Veç tjerash, dyshja nga Peja kanë rrëfime interesante që lidhen me përvojën e hershme të tyre qëkur mbajnë e kultivojnë qen të racës autoktone.

Duke i ndarë këto rrëfime, ata vënë në pah shumë karakteristika të racës autoktone ilire.