Që nga orët e hershme të mëngjesit, blegtorët nga rrethina e Pejës kanë dalë në treg për të shitur qumësht, djathë, mazë e produkte të tjera.
Ata janë të kënaqur me produktet e bulmetit dhe nga plasimi i tyre në treg, por thonë se bujqësia ka mbetur si sektor i pashfrytëzuar sa duhet në këto anë.
Edhe blerësit e djathit po ashtu u shprehën të kënaqur me produktet vendore.
Blegtorët theksojnë se ka një rritje të prodhimit të djathit, që ka të bëjë drejtpërdrejt me të reshurat atmosferike dhe ndikimin e tyre në vegjetacionin e bujshëm në kullosat verore, në malet e Pejës.
Ramadan Caka, blegtor nga Studenica e Istogut, thotë se kualiteti i lartë i djathit të bardhë tradicional ka ndikuar edhe në shitjen e shpejtë, kryesisht në vendin tonë.
Ai tregoi se shitja rritet në kohën kur vijnë mërgimtarët, por ka shprehur pakënaqësi me çmimin që po sillet.
Avokat me profesion, Xhelal Radoniqi tregoi se është blerës i rregullt i produkteve vendore. Ai thekson se ka një lloj djathi më specifik, që e blen në këtë treg.
Me shumë se 20 vjet blegtor, Avni Berisha nga Peja, është i lumtur që ka një rritje të djathit tradicional në Pejë. Por, sipas tij, vite më parë është shitur më shumë djathë sesa tash.
Muhamet Zara tregon se është një merakli i djathit të lopës.
E, Ali Hajzeri nga Istogu pohon se produktet e qumështit këtu në treg dallojnë nga ato që ofrohen të paketuara të markete.
Fshatrat e Pejës njihen për traditën shekullore të shitjes së djathit dhe sado që investimet në bujqësi janë rritur dukshëm viteve të fundit, sipas blegtorëve, prodhimet vendore nuk përmbushin as përgjysmë nevojat e tregut.
Sasia më e madhe e prodhimeve të qumështit sigurohet nga importi.
