Me ushqime bio një familje po e zhvillon turizmin në bjeshkën e Strellcit

Bukuritë unike të Strellcit të Deçanit mund të shijohen që kur nis rruga për ta ngjitur bjeshkën.

Mbi 2000 metra është lartësia mbidetare e bjeshkëve atje.

Në sezonin e verës për vizitorët bjeshka e Strellcit është ndër destinacionet e preferuara.

Të tillë e bën ajri, natyra e qetësia që e mbizotëron vendin.

Përballë bjeshkës së Strellcit mund të vështrohen bjeshkët e Preljepit, Rroshkoldolit e ato të Junikut.

Stanet në këtë lartësi marrin jetë nga muaji maj.

Ato gjallërohen nga vendësit e nga blegtorët që me vete marrin edhe bagëtitë e atje qëndrojnë deri në tetor.

Ekipi i emisionit “JETA” në këtë bjeshkë ka takuar edhe rojën e parkut të mbrojtur, Muharrem Balaj.

Balaj ka thënë se vetëdijesimi i qytetarëve është ngritur dhe kohët e fundit nuk ka dëmtime si në vitet e mëparshme.

“Ne jemi vazhdimisht në orar të punës, jemi pra çdo ditë në terren sidomos aty ku e shohim se duhet të jemi të pranishëm. Fatmirësisht, ndërgjegjësimi i qytetarëve vërehet dukshëm, por nëse nuk e mbrojnë natyrën ne e ngremë fletëparaqitjen dhe e dërgojmë në organe gjyqësore që të merren me këtë probleme”, ka thënë ai.

Në 1300 metra lartësi familja Istrefaj ka ndërtuar restorantin tradicional, i vetmi në këtë bjeshkë.

Përmes ushqimeve bio, produktet e të cilave i sigurojnë nga blegtorët vendës që gjatë gjithë verës qëndrojnë në stane, familja nga Strellci synon që ta zhvillojë edhe më shumë turizmin në këtë anë të Deçanit.