-
Nga:
Arsim Maxhera
- 15 shtator 2025 18:56
- Shpërndaje në:
Tashmë është zyrtare.
Ndeshja mes Serbisë dhe Shqipërisë nuk do të zhvillohet në stadiumin “Rajko Mitiq” në Beograd.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoUEFA ka pranuar kërkesën e federatës serbe që ndeshja të zhvillohet në stadiumin “Duboçica” në Leskovc. Ndeshja zhvillohet më 11 tetor dhe i takon kualifikimeve për Kupën e Botës 2026.
UEFA në faqen zyrtare e ka ndryshuar vendin e zhvillimit të ndeshjes. Deri të hënën mbrëma shkruante se ndeshja zhvillohet në stadiumin “Rajko Mitiq” në Beograd, ndërsa tani shkruan “Duboçica” në Leskovc.
Federata e Futbollit e Serbisë kishte vendosur që ndeshjen ta organizojë në stadiumin e Cërvena Zvezdës në Beograd, njëjtë si atë ndaj Anglisë që u zhvillua një javë më parë. Pos pas telasheve të shfaqura në ndeshjen ndaj Anglisë, të cilën serbët e humbën 5:0, u vendos që me Shqipërinë të luhet në Leskovc. Për këtë duhej pajtueshmëria e FSHF-së dhe vendimi i UEFA-s.
Gjatë ndeshjes me Anglinë kishte fyerje ndaj përzgjedhësit të Serbisë, Dragan Stojkoviq, fishkëllima ndaj lojtarëve, e po ashtu fyerje ndaj presidentit të Serbisë, Aleksandar Vuçiq. Gjatë ndeshjes, derisa tifozët po bënin fyerje ndaj pushtetit në Serbi, huliganë të afërt me Vuçiqin i sulmuan ata.
Po ashtu ka pasur thirrje anti-Kosovë dhe shpalosje të flamurit të Serbisë mbi hartën e Kosovës.
Ka gjasa që federata serbe të dënohet për gjitha këto shkelje. Një prej dënimeve të mundshme është që me Shqipërinë ndeshja të zhvillohet pa praninë e shikuesve.
Stadiumi në Leskovc ka kapacitet vetëm prej 8000 ulëseve dhe ishte kërkesë e Vuçiqit që ndeshja me kuqezinjtë të luhet në këtë qytet. Kjo u raportua që u bë për të shmangur fyerjet ndaj presidentit serb dhe pushtetit të tij. Në Beograd ndaj Anglisë ishin 40 mijë shikues dhe kontrollimi i gjithë kësaj mase ishte i pamundshëm. Ndërkohë kontrollimi i 8000 personave është më i mundshëm, ndër të tjera me kontrollimin e procesit të shitjes së biletave.
Ndeshja e 11 tetorit është vendimtare për vendin e dytë në Grupin K të kualifikimeve për Botëror. Vendi i parë pritet t’i takojë Anglisë.
Aktualisht Shqipëria e ka një pikë më shumë se Serbia, por edhe një ndeshje më shumë. Praninë në Leskovc e ka paralajmëruar edhe presidenti serb, Vuçiq.
