-
Nga:
Arsim Maxhera
- 13 qershor 2025 11:33
- Shpërndaje në:
Federata e Futbollit e Serbisë të enjten njoftoi se ndeshja e 11 tetorit mes Serbisë dhe Shqipërisë do të zhvillohet në stadiumin “Rajko Mitiq” në Beograd. Bëhet fjalë për stadiumin e Cërvena Zvezdës, me kapacitet prej 51 mijë e 755 vendeve.
Ka pasur dilema nëse ndeshja do të luhet në Beograd apo në Leskovc. Dhe është vendosur për stadiumin më të madh në Serbi, ku do të luhet edhe ndeshja me Anglinë, më 9 shtator.
Por a do të lejohen tifozët e Shqipërisë në stadiumin në Beograd? Këtë pyetje e ka bërë mediumi beogradas, Sportklub.
Ky medium ka shkruar se anglezët do të jenë të mirëpritur më 9 shtator dhe letonezët më 16 nëntor. Por ka pyetur nëse mbështetësit e Shqipërisë do të jenë në Beograd më 11 tetor.
“Me shumë mundësi jo, ndonëse në këtë moment nuk ka vendim që i ndalon shqiptarët të udhëtojnë për këtë ndeshje. Nuk ka po ashtu asnjë vendim që FIFA e dallon ndeshjen Serbi – Shqipëri nga të tjerat. Tifozët e Serbisë nuk e kishin të lejuar të udhëtojnë për ndeshjen e së shtunës në Tiranë për shkak të dënimit ndaj Federatës së Futbollit të Serbisë për ‘nacionalizmin në ndeshjen e Ligës së Kombeve me Zvicrën’”, ka shkruar Sportklub.rs.
Edhe sikur të mos ishte e dënuar federata serbe, gjasat që tifozët e Serbisë të ishin në Tiranë thuajse nuk ekzistonin.
Ndeshja ishte vlerësuar e rrezikshmërisë së lartë, ndërsa kërkesa për një biletë ishte shumë e madhe. Gjatë gjithë ndeshjes, por edhe para e pas saj, ka pasur fyerje ndaj serbëve. Dhe me shumë mundësi FIFA do të marrë vendim që të mos lejojë përkrahësit e Shqipërisë në Beograd. Apo kjo do të bëhet pa vendim, në heshtje. Por tifozët shqiptarë nuk do të lejohen në stadium.
“Për shkak se edhe tifozët shqiptarë kanë dosje të trashë në FIFA dhe UEFA, pritet që kjo të shfrytëzohet si arsye për vendimin për të ndaluar udhëtimin e organizuar për revanshin në Beograd. Por për momentin nuk ka asnjë pengesë që tifozët shqiptarë të jenë të pranishëm në ‘Rajko Mitiq’”, ka shkruar mediumi serb.
Në ndeshjen e kaluar të Shqipërisë në Beograd, në vitin 2014, nuk ishin lejuar tifozët shqiptarë të jenë në stadiumin e Partizanit. Në atë ndeshje ishin sulmuar rëndë lojtarët e Shqipërisë, nga huliganë serbë që ishin në tribuna e në fushë. Ishte raportuar për pak shqiptarë që kishin depërtuar në stadium, por pa treguar se janë shqiptarë dhe pa asnjë shenjë dalluese.
Për vendimin që ndeshjet me Anglinë dhe Shqipërinë të zhvillohen në Beograd, ka folur edhe presidenti i Serbisë, Aleksandar Vuçiq. Ai në fakt më shumë është ndalur te ndeshja me Anglinë dhe ka thënë se ka dashur që ajo ndeshje të zhvillohet në Leskovc.
“Unë isha që ndeshja me Anglinë të luhet në Leskovc. Njerëzit në Leskovc nuk janë asgjë më pak të vlefshëm se ata në Beograd. Por anglezëve nuk iu shkohet në Leskovc. As që mërzitem që nuk iu shkohet. Kam pranuar dhjetëra letra dhe asnjërën nuk e kam hapur. Por disa nuk kanë mundur ta durojnë presionin dhe e kanë zhvendosur ndeshjen në Beograd”, ka thënë Vuçiq në një televizion serb.
Ai i ka bërë përgjegjës për ndryshimin drejtuesit e federatës serbe të futbollit.
KOHA i ka shkruar FIFA-s lidhur me atë se a do të lejohen tifozët shqiptarë në ndeshjen në Beograd.
Por nuk ka pranuar ende përgjigje.
Tifozët e Shqipërisë, përkatësisht Tifozat Kuq e Zi, ishin këtë javë në Riga të Letonisë. Por ky grup ka ngrirë raportet me FSHF-në për shkak të vendimit që të organizohet Evropiani U21 i vitit 2027 bashkë me Serbinë. Po ashtu TKZ ka pasur vërejtje të shumta për mënyrën e ndarjes së biletave për ndeshjen me Serbinë dhe çmimin e tyre.
Nëse nuk lejohen tifozët shqiptarë, që edhe pritet të ndodhë, kjo do të dëshmojë edhe një herë se sa i pakuptueshëm është vendimi për organizim të përbashkët të një Evropiani nga Shqipëria dhe Serbia.
