Granit Xhaka ka folur për herë të parë në detaje rreth procedurës penale të hapur në Zvicër lidhur me një certifikatë vaksinimi kundër COVID-19.
Kapiteni i Përfaqësueses së Zvicrës ka pranuar se gjatë pandemisë kishte siguruar një certifikatë vaksinimi, ndonëse nuk e kishte marrë vaksinën në mënyrën e deklaruar në dokument.
Xhaka ka thënë se në atë periudhë kishte pasur dyshime dhe frikë lidhur me vaksinën. Ai e ka pranuar se vendimi për të siguruar certifikatën ishte i gabuar dhe ka bërë të ditur se është i gatshëm të bashkëpunojë me autoritetet zvicerane.
“Ditët e fundit, ka pasur shumë raportime për një çështje nga e kaluara ime. Do të doja ta trajtoja këtë personalisht. Lidhur me vaksinimin kundër Covid-19, personalisht isha shumë i pasigurt dhe kisha shqetësime serioze në atë kohë. Ndjeva një mosbesim të thellë ndaj vaksinës dhe u përfshiva nga frika dhe pasiguria. Në këtë gjendje emocionale të trazuar, mora një certifikatë vaksinimi në vend që t'i sqaroja pyetjet e mia të hapura përmes kanaleve të duhura”, ka thënë Xhaka, shkruan të hënën “Blick”.