Golashënuesi më i mirë i të gjitha kohërave në Premier League, Alan Shearer, ka zgjedhur formacionin më të mirë të pjesës së deritashme të edicionit 2025/2026 në kampionatin elitar të Anglisë.
Në formacionin e Shearerit të publikuar në faqen zyrtare të Premier Leagues, vend ka zënë edhe kapiteni i Sunderlandit, Granit Xhaka.
Shearer ka arsyetuar vendimin e tij duke e përshkruar Xhakën si lider brenda dhe jashtë fushës.
“Aftësia e tij me top ka qenë e mrekullueshme, ashtu si edhe cilësitë e tij prej lideri brenda dhe jashtë fushës”, ka komentuar Shearer.
Në mesfushë janë përzgjedhur edhe Declan Rice i Arsenalit dhe Moises Caicedo i Chelseat.
Sulmit i prin Erlind Haaland i Manchester Cityt, i përkrahur nga Phil Foden i Cityt dhe Morgan Rogers i Aston Villas.
Mbrojtja përbëhet nga Jurrien Timber, Marc Guehi, Gabriel dhe Marc Cucurella.
Në portë është përzgjedhur Robin Roefs.
Xhaka 33-vjeçar iu bashkua Sunderlandit nga Bayer Leverkuseni në korrik të vitit të kaluar për 15 milionë euro.
Ai u bë shpejtë lider i Sunderlandit. Ka kontribuar me një gol dhe pesë asistime në 21 ndeshje në Premier League.
Shumë njohës e kanë vlerësuar transferimin më të mirë të verës së kaluar në Premier League.
