Përzgjedhësi i Shqipërisë në futboll, Sylvinho, ka publikuar të premten listën e lojtarëve për ndeshjet e shtatorit.
Shqipëria më 4 shtator e luan miqësoren me Gjibraltarin në udhëtim, ndërsa më 9 shtator e pret Letoninë në “Air Albania”, në kuadër të kualifikimeve për Kupën e Botës 2026.
Ndeshjen e kaluar kuqezinjtë e zhvilluan pikërisht ndaj Letonisë. Barazuan 1:1 në Riga, më 10 qershor. Më 7 qershor, Shqipëria barazoi pa gola me Serbinë në Tiranë, kështu që fitorja ndaj Letonisë është e domosdoshme për të mbajtur gjallë shpresat për kualifikim.
Shqipëria nisi kampanjën kualifikuese më 21 mars, kur pësoi 2:0 nga Anglia në “Wembley”. Më 24 mars, të përzgjedhurit e Sylvinhos shënuan fitore të pritur ndaj Andorrës, 3:0.
Sylvinho ka ftuar lojtarë të konfirmuar. Sulmi do të përbëhet nga Armando Broja, Myrto Uzuni, Rey Manaj e Mirlind Daku.
Kombëtarja grumbullohet të hënën në Malaga. Në Tiranë, kuqezinjtë kthehen më 5 shtator, ku do të përgatiten për ndeshjen me Letoninë.
Portierë: Thomas Strakosha, Elhan Kastrati, Mario Dajsinani
Mbrojtës: Elseid Hysaj, Ivan Balliu, Mario Mitaj, Naser Aliji, Marash Kumbulla, Adrian Bajrami, Berat Gjimshiti, Arlind Ajeti
Mesfushorë: Ylber Ramadani, Juljan Shehu, Kristjan Asllani, Medon Berisha, Qazim Laçi, Adrion Pajaziti, Nedim Bajrami, Arbër Hoxha, Ernest Muçi, Jasir Asani
Sulmues: Armando Broja, Myrto Uzuni, Rey Manaj, Mirlind Daku