Ousmane Dembele, fitues i Topit të Artë

Ylli i Paris Saint-Germainit, Ousmane Dembele, është fitues i Topit të Artë për edicionin 2024/2025. 28-vjeçari u shpall futbollisti më i mirë në botë në ceremoninë e mbajtur të hënën mbrëma në Paris.

Në fakt është pritur që sulmuesi i Parisit të shpallet më i miri. Edicioni i kaluar ishte i shkëlqyer për sulmuesin e Francës. Ai e udhëhoqi PSG-në drejt triumfit të parë në Ligën e Kampionëve. Me Parisin e ka fituar edhe titullin e kampionit dhe kupën e Francës. Ndërkohë ka arritur në finale të Botërorit të Klubeve.

Në edicionin e kaluar, Dembele i shënoi plot 35 gola në 53 paraqitje në të gjitha garat. I kishte edhe 16 asistime. Në kampanjën që përfundoi me titull në Champions, Dembele i realizoi tetë gola e gjashtë asistime në 15 paraqitje.

Dembele për herë të parë e ka fituar Topin e Artë, që është trofeu kryesor individual në futboll. Ai fitoi në konkurrencë të fortë me yllin e ri të Barcelonës, 18-vjeçarin Lamine Yamal.

Topin e Artë, Dembeles ia dorëzoi superylli brazilian, Ronaldinho.

Edhe Futboll 16 dhj 2025 FIFA zgjedh më të mirët e vitit

Yamal po ashtu vlerësohej kandidat shumë i fortë në garën për “Ballon d’Or”. Por triumfi në Champions i Dembeles bëri dallimin. Yamali ka fituar titullin e kampionit në Spanjë dhe Kupën e Spanjës. 

Në dhjetëshen e parë në garën për Topin e Artë kanë zënë vend edhe Vitinha, Mohamed Salah, Rafinha, Achraf Hakimi, Kylian Mbappe, Cole Palmer, Gianluigi Donnarumma dhe Nuno Mendes.

Ky ishte edicioni i 69-të i Topit të Artë. Vjet më i miri ishte shpallur Rodri, mesfushori spanjoll i Manchester Cityt.

Derisa një vit më parë më herët ishte kuptuar se kush do të fitonte, këtë herë “France Football” e ka mbajtur sekretin deri në fund. Dembele është llogaritur favorit dhe ka fituar në fund.

Në ceremoninë madhështore të së hënës mbrëma janë ndarë edhe shumë çmime të tjera.

Edhe Futboll 23 sht 2025 Messi uron Dembelen për Topin e Artë

Futbollistja më e mirë e edicionit të kaluar u shpall Aitana Bonmati. Spanjolla e Barcelonës u shpall më e mira për herë të tretë rresht.

Paris Saint-Germaini është shpallur klubi më i mirë i edicionit të kaluar, ndërsa klubi më i mirë te femrat u shpall Arsenali.

Trofeun Gerd Muller për golashënuesin më të mirë e fitoi Viktor Gyokeres. Te futbollistet më së shumti gola kishte Eëa Pajor.

Portieri më i mirë është shpallur Gianluigi Donnarumma, që ishte pjesë e PSG-së e tani luan për Manchester Cityn. Hannah Hampton e Chelseat është portierja më e mirë e vitit.

Nuk kishte befasi as sa i takon trajnerit të vitit. Luis Enrique u shpall më i miri i vitit, ndërsa trajnerja më e mirë u shpall holandezja Sarina Wiegman.

Edhe Futboll 22 sht 2025 Të hënën “Topi i Artë”, Dembele pritet të jetë fituesi

Yamali megjithatë ka fituar një trofe. Ai u shpall lojtari më i mirë i ri dhe fitoi Trofeun Kopa. Vicky Lopez e Barcelonës u shpall futbollistja më e mirë e re.

Në mbrëmjen me shumë yje, mbreti ishte Ousmane Dembele. Ai mbajti një fjalim shumë emocional në fund. Ai tani është fitues i çmimit kryesor individual në futboll.