Vjosa Osmani dekoron presidentin e FIFA-s

Pasi e pranoi Medaljen Presidenciale të Meritave nga presidentja e Kosovës, Vjosa Osmani, udhëheqësi i shtëpisë botërore të futbollit, Gianni Infantino, vendosi dorën e djathtë në zemër në shenjë falënderimi për respektin. 

Me Medaljen në gjoks, presidenti i FIFA-s, Infantino, iu drejtua të pranishmëve me një fjalim. Fjalimin e gjatë e nisi vetëm pasi u çlirua nga emocionet.

Ai tha se është i nderuar dhe i lumtur për dekoratën e pranuar nga presidentja e Kosovës. 

“Çfarë kënaqësie, çfarë emocioni, çfarë lumturie për mua të jem në shtëpi sot, në Kosovë, për ta pranuar këtë nderim kredibil, këtë medalje nga ju, nga presidentja, në emër të një shteti të bukur siç është Kosova. Kosova sot, Prishtina sot, është kryeqyteti i botës, botës së futbollit. Por siç të gjithë ne e dimë se futbolli është gjëja më e rëndësishme në botë, është kryeqyteti i botës. Por është emocion shumë i madh për mua që po qëndroj para jush. Kërkoj falje që po flas anglisht, por shqipja ime ende nuk është në nivelin që do të duhej të ishte. Por, do të marrë mësime për vitet e ardhshme dhe të flas shqip”, ka thënë Infantino.

Medaljen presidenti i FIFA-s ia dedikoi legjendës kosovare të futbollit, të ndjerit Fadil Vokrri.

“Do të doja që këtë medalje, këtë njohje, këtë nderim, t’ia dedikoj Fadil Vokrrit dhe gjithë popullit të Kosovës. Në Kosovë dhe jashtë Kosovës. E kam takuar Fadilin shumë, shumë herë. Dhe më kujtohet kur Kosova ishte shtet shumë i ri dhe Federata e Futbollit e Kosovës donte të bëhej anëtare e UEFA-s, unë isha në UEFA në atë kohë. Dhe më thanë, Gianni, shko e takoje Fadil Vokrrin. U takova me të, kemi diskutuar, unë isha në krye të Departamentit Ligjor të UEFA-s në atë kohë dhe kemi folur për statuset, marrëdhëniet e shumëçka tjetër. Dhe pas shumë vjetësh e shumë takimesh, e kemi pritur momentin dhe kemi parë qëndrueshmërinë dhe kurajën e njerëzve të Kosovës, të cilët kanë besuar në shtetin e tyre, në atë që e kanë dashur. Dhe kjo qëndrueshmëri u solli menjëherë pranimin në UEFA dhe FIFA. Sa herë që shkoja në ndonjë takim në Shqipëri, apo në ndonjë shtet tjetër, Fadili ishte aty. Po sa e hapa derën, sapo hapa ndonjë dritare, Fadili ishte pranë dritares. Shkoja jashtë, ai ishte aty. Ishte gjithandej”, është shprehur Infantino.

Infantino u zgjodh president i FIFA-s më 26 shkur të vitit 2016. Tre muaj pasi u zgjodh president, Federata e Futbollit e Kosovës, atëbotë e udhëhequr nga legjenda Vokrri, u pranua në FIFA. Pranimit në FIFA ia hapi rrugën anëtarësimi në UEFA, më 3 maj 2016.

“Kur unë u bëra president i FIFA-s, më 26 shkurt të vitit 2016, për mua ishte e qartë. Në rastin e parë Kosova duhej të bëhej anëtare e FIFA-s. Dhe më 30 maj të vitit 2016, tre muaj pasi mora postin e presidentit të FIFA-s, isha krenar të isha president e ta pranoja Kosovën në familjen e FIFA-s. Kështu që, mirë se vjen në FIFA, Kosovë!”, ka kujtuar Infantino momentin e pranimit. 

Në ceremoninë e mbajtur të mërkurën në Prishtinë, Infantino ka kujtuar kohën kur si lojtar ka pasur përballje me lojtarë të ndryshëm të Kosovës në turne të shumtë në Zvicër.

Në ceremoni të pranishëm ishin edhe personalitete të shumta, kryesisht të komunitetit të sportit, e në veçanti të futbollit. Ishte edhe presidenti i FFK-së, Agim Ademi, dhe ai i Federatës Shqiptare të Futbollit, Armando Duka. 

Të pranishëm ishin edhe lojtarët dhe përzgjedhësi i Kosovës, Franco Foda.

Zvicerani Infantino ftoi lojtarët e Kosovës t’i bashkoheshin në skenë. 

“Tani më falni nëse po e shkel protokollin. Më lejoni t'i ftoj lojtarët të vijnë në skenë. Dua fillimisht nga lojtarët dhe të pranishmit që të duartrokisni për lojtarët e gjeneratës së artë. Ju jeni këtu falë atyre. Dhe tani dua nga ju të gjithë, të duartrokisni për këta lojtarë këtu. Kështu që, e dashura Presidente, të dashur miq, besoni në këta djem këtu, besoni në fëmijët e juaj, besoni në të ardhmen tuaj, besoni në futboll, investoni në futboll, sepse magjia e futbollit është e veçantë. I bashkon shtetet, krijon shtetet, dhe i sjellë në tërë botën. Ju falënderoj të gjithëve për pritjen”, është shprehur Infantino. 

Presidentja Vjosa Osmani ka vlerësuar Infantinon për mbështetjen që ia ka dhënë Kosovës.

“Ne gjithmonë do të kujtojmë se ke qëndruar pranë nesh gjatë këtyre momenteve historike dhe kritike në pranimin në UEFA dhe FIFA. Ju keni besuar te ne, keni besuar në potencialin e Kosovës dhe në fuqinë unifikuese të sportit, në kohën kur besimi kërkonte guxim. Ju e kuptuat se futbolli në zemrën e tij e ka humanitetin, duke i dhuruar secilit fëmijë, pavarësisht prejardhjes, shansin për të qenë aty. Me ju si drejtues, FIFA është bërë familje e vërtetë e shteteve, familje në të cilën kanë vend të gjithë. Ju keni punuar pa pushim për të na siguruar se futbolli ndërton ura mes njerëzve, kudo që ata jetojnë. Dhe për Kosovën, kjo ka qenë vetë bota”, ka thënë Osmani. 

Presidentja e vendit ka thënë se ka qenë kontributi i Infantinos që ka bërë që secilit fëmijë të Kosovës t’i jepet arsye për të ëndërruar.

“President Infantino, faleminderit që e keni besuar tregimin tonë. Faleminderit që i keni besuar popullit të Kosovës! Faleminderit që i keni dhuruar secilit fëmijë në Kosovë arsye për të ëndërruar. Dhe faleminderit që keni qëndruar me ne, jo vetëm në momentet triumfuese, por më me rëndësi, në momentet e sfidave! Dhe faleminderit që keni qenë mik i afërt i shtetit tonë dhe vlerave që e bëjnë sportin njërën prej forcave më të mëdha në botën e sotme! Faleminderit shumë!”, ka thënë Osmani.

Kjo është vizita e dytë që e bën presidenti i FIFA-s në Kosovë. Vizitën e parë Infantino e realizoi në vitin 2022.

Presidentja Vjosa Osmani ka vlerësuar Infantinon për mbështetjen që ia ka dhënë Kosovës në momente festive “por më së shumti për ato sfiduese”. Ajo ka thënë se ka qenë kontributi i Infantinos që ka bërë që secilit fëmijë të Kosovës t’i jepet arsye për të ëndërruar.