-
Përktheu:
Vita Abrashi-Kajtazi
- 26 tetor 2026 23:00
- Shpërndaje në:
Tensioni i lartë i gjakut, i njohur edhe si hipertension, shpesh quhet “vrasës i heshtur”, sepse mund të zhvillohet për vite me radhë pa shkaktuar simptoma të dukshme. Megjithatë, ai është një nga faktorët kryesorë të rrezikut për sëmundjet e zemrës dhe vdekjet në mbarë botën, ka shkruar EatingWell.
Një studim i publikuar në revistën shkencore BMJ Public Health ka zbuluar se më shumë se gjysma e personave me tension të lartë në Britani nuk janë në dijeni të gjendjes së tyre.
Çka zbuloi studimi?
Studiuesit analizuan të dhënat e më shumë se 1.4 milionë të rriturve, të moshës 18 vjeç e lart, për të vlerësuar sa i përhapur është tensioni i lartë, sa persona diagnostikohen dhe sa prej tyre e mbajnë nën kontroll.
Studiuesit e përkufizuan tensionin e lartë të gjakut, sipas udhëzimeve të Organizatës Botërore të Shëndetësisë (OBSH), si presion sistolik të gjakut 140 mmHg, presion diastolik 90 mmHg, ose përdorim të barnave për uljen e tensionit, të raportuar nga vetë pjesëmarrësit.
Rezultatet treguan se 37.2 për qind e pjesëmarrësve kishin tension të lartë, ndërsa 58.8 për qind e personave me këtë gjendje nuk e dinin se e kishin. Kjo do të thotë se nuk kishin raportuar një diagnozë të mëparshme dhe as përdorimin e barnave për uljen e tensionit.
Tensioni i lartë i padiagnostikuar ishte më i shpeshtë te burrat. Në mesin e pjesëmarrësve që nuk kishin raportuar diagnozë të hipertensionit, 33.2 për qind e burrave dhe 21.2 për qind e grave kishin vlera të tensionit prej të paktën 140/90 mmHg.
Studimi gjeti gjithashtu se personat me indeks më të lartë të masës trupore, duhanpirësit, ata që konsumonin alkool dhe personat me histori personale ose familjare të sëmundjeve të zemrës kishin më shumë gjasa të kishin tension të lartë.
Një tjetër shqetësim ishte se edhe trajtimi nuk garantonte gjithmonë kontrollin e duhur të tensionit. Rreth 50.2 për qind e pjesëmarrësve që merrnin barna për hipertensionin vazhdonin të kishin vlera prej të paktën 140/90 mmHg.
Megjithatë, studiuesit theksuan se matjet u kryen në momentin e regjistrimit të pjesëmarrësve. Meqë tensioni mund të ndryshojë gjatë ditës, një matje e vetme e lartë nuk mjafton gjithmonë për të konfirmuar diagnozën dhe mund të nevojiten matje të përsëritura.
Pse është i rrezikshëm tensioni i lartë?
Hipertensioni mund të mos japë shenja paralajmëruese, por me kalimin e kohës mund të dëmtojë organizmin dhe të rrisë rrezikun për probleme serioze shëndetësore, përfshirë sëmundjet e zemrës dhe sulmin në zemër, sulmin në tru, sëmundjet kronike të veshkave, humbjen e shikimit dhe demencën.
Për këtë arsye, matja e rregullt e tensionit është një nga mënyrat më të rëndësishme për ta zbuluar problemin në kohë.
Si mund ta mbani tensionin nën kontroll?
Përveç kontrolleve të rregullta mjekësore, disa ndryshime në stilin e jetesës mund të ndihmojnë në parandalimin dhe menaxhimin e tensionit të lartë.
1. Bëni aktivitet fizik. Synoni rreth 150 minuta aktivitet fizik me intensitet të moderuar në javë, si ecja e shpejtë ose biçikleta.
2. Ushqehuni shëndetshëm. Konsumoni më shumë fruta, perime dhe drithëra integrale. Kufizimi i kripës dhe alkoolit mund të ndihmojë gjithashtu në uljen e tensionit.
3. Mbani peshë të shëndetshme. Mbipesha dhe obeziteti mund të rrisin rrezikun për hipertension.
4. Menaxhoni stresin. Stresi i vazhdueshëm mund të ndikojë në shëndetin e përgjithshëm. Aktivitetet relaksuese dhe kërkimi i ndihmës kur është e nevojshme mund të jenë të dobishme.
5. Shmangni duhanin. Duhani rrit rrezikun për sëmundje të zemrës dhe sulmit në tru. Lënia e tij ndihmon në përmirësimin e shëndetit kardiovaskular.
6. Njihni historinë tuaj shëndetësore. Nëse në familjen tuaj ka raste të tensionit të lartë ose sëmundjeve të zemrës, tregojani mjekut, pasi kjo mund të ndihmojë në vlerësimin e rrezikut tuaj.
7. Mos i neglizhoni kontrollet mjekësore. Mateni tensionin rregullisht, edhe nëse ndiheni mirë dhe nuk keni simptoma.