Në Zvicër janë të brengosur pas vendimit të Leon Avdullahut që të luajë për Kosovën e jo për përfaqësuesen helvetike. Avdullahu, mesfushor i Hoffenheimit, është rritur në Zvicër dhe ka luajtur për të gjitha grupmoshat e reja të përfaqësueses zvicerane. Por në nivelin e të rriturve ka vendosur të luajë për Kosovën. Dhe mund të debutojë pikërisht ndaj Zvicrës, të premten në Basel.
Eman Kospo po ashtu vendosi për Bosnjë-Hercegovinën e jo për Zvicrën së fundi, ndërsa Albian Hajdari e ka lënë të hapur mundësinë e kalimit te Kosova nga Zvicra.
Kjo ka bërë që zviceranët të kërkojnë ide se si t’i mbajnë futbollistët e talentuar që rriten në këtë vend.
“Blick” ka shkruar se në federatën e futbollit të Zvicrës nuk punojnë sa duhet në këtë drejtim. Sipas gazetës së madhe zvicerane, komunikimi mes drejtorit të ekipit kombëtar, Pierluigi Tami, dhe drejtuesve të federatës nuk është i duhur. Gazeta zvicerane shkruan se Tami duhet të jetë i vetëdijshëm për rëndësinë e lojtarëve me shtetësi të dyfishtë.
Shefi i futbollit në “Blick”, Tobias Wedermann, doli me ide konkrete për t’i rritur gjasat që lojtarët e talentuar të vendosin për Zvicrën e jo përfaqësuese të tjera.
“Për të parandaluar që raste si ai i Kospos e Avdullahut të mos ndodhin më dhe marrë për bazë numrin e madh të lojtarëve me shtetësi të dyfishtë në ekipet e reja, zgjidhja për Federatën e Futbollit të Zvicrës është e qartë: ekipit nacional i duhet një menaxher për talentët me shtetësi të dyfishtë”, ka shkruar Wedermann.
Sipas tij, ky menaxher do të merrej me komunikimin me lojtarë, familje, agjentë, do ta monitoronte dhe përkrahte karrierën e lojtarëve, do t’i prezantonte përparësitë e futbollit zviceran dhe po ashtu do të kujdesej që të kuptohet se si është të mbahen dy vende në zemër.
Ai madje ka përmendur kandidatë potencialë për këtë pozitë. Natyrisht, shqiptarë.
“Ka kandidatë të fortë për këtë: Admir Mehmedi apo Blerim Xhemaili për shembull. Të dy kanë rrjet të vlefshëm që shtrihet përtej futbollin zviceran, kanë sy për potencialin e lojtarëve të rinj, flasin shumë gjuhë, janë vetë me shtetësi të dyfishtë dhe pos që kanë luajtur në nivelin më të lartë, kanë kredibilitet dhe njohje në mesin e lojtarëve të rinj. Valon Behrami apo Gokhan Inler po ashtu do të ishin kandidatë që do t’i përshtateshin plotësisht këtij profili. Por federatës do t’i duheshin argumente shtesë, pasi të dy kanë kontrata me klube, Watfordin dhe Udinesen”, ka shkruar shefi i “Blick”.
Ai vlerëson se krijimi i kësaj pozite do të ishte sinjal i fuqishëm për zhvillimin e talenteve në Zvicër dhe shenjë se federata po bën çdo gjë për të vazhduar me paraqitje në Kampionate Botërore e Evropiane.
“Aktualisht, të verbuar nga sukseset e viteve të fundit, në federatë duket se e kanë humbur rrugën”.