Ndeshje interesante në xhiron e tretë të Superligës

Të dielën (sot) janë katër ndeshje të xhiros së tretë të Superligës së Kosovës në futboll. Dhe secila është më e rëndësishme se tjetra.

Liderja e tabelës, Prishtina, përballet në udhëtim me Gjilanin, në njërin prej derbive të kësaj xhiroje. Ndeshja Gjilani – Prishtina zhvillohet nga ora 16:30 në fushën me bari artificial në Gjilan.

Prishtina i ka fituar ndeshjet e dy xhirove të para dhe udhëheq në tabelë me gjashtë pikë. Gjilani ka nisur zbehtë, duke fituar vetëm një pikë, dhe do të mundohet të reagojë. Gjilani ka nisur edicionin me synime të mëdha, por pa shënuar ende fitore.

Prishtina në xhiron e parë fitoi 3:2 në udhëtim ndaj Dukagjinit, ndërsa Gjilani luajti 1:1 në shtëpi me Ballkanin. Në xhiron e dytë Prishtina fitoi 3:0 ndaj Llapit, derisa Gjilani humbi 2:0 nga Dukagjini.

Derisa skuadra prishtinase synon të vazhdojë me fitore, gjilanasit do të mundohen të dëshmojnë se humbja në Klinë ishte vetëm dështim i momentit.

“Na pret ndeshje e fortë. Na vjen skuadra që është plot me besim. Por kam besim te karakteri i skuadrës sonë, gjithashtu te përgatitja që kemi bërë për ndeshjen e nesërme. Mënyra se si e kemi përgatitur skuadrën është që të jemi të disiplinuar dhe të jemi të qetë kur e kemi topin. Duhet të jemi të qetë para portës, të rrezikshëm dhe të shfrytëzojmë secilën mundësi që na paraqitet. Kemi respekt për kundërshtarin, por pres që skuadra ime të bëjë diferencën në ndeshje”, ka thënë të shtunën trajneri i Gjilanit, Ardian Nuhiu.

Ferizaj është skuadra tjetër e vetme që mori maksimumin në dy xhirot e para. Ferizaj e pret Ballkanin në tjetër ndeshje interesante të së dielës.

Ferizajasit në xhiron e parë fituan 1:0 ndaj Dritës, ndërsa në të dytën mposhtën po 1:0 në udhëtim Prishtinën e Re. Suharekasit kanë dy barazime. Pas barazimit 1:1 në Gjilan, luajtën 1:1 edhe me Malishevën.

“Jemi të motivuar dhe të përgatitur për këtë ndeshje. I dimë cilësitë që i kemi dhe do të japim 100 % për ta fituar këtë takim. Kemi një objektiv për fund të sezonit, prandaj na duhet të kthehemi te fitorja dhe të marrim pikë. Ferizaj ka ekip të mirë, por ne jemi Ballkani dhe do të shkojmë atje për të bërë një ndeshje të madhe dhe për ta marrë fitoren”, ka thënë mesfushori brazilian i Ballkanit, Giovanni.

Rivalitet i madh pritet edhe në ndeshjet Malisheva – Dukagjini dhe Drenica – Prishtina e Re. Të gjitha këto skuadra synojnë fitore për të shkuar në frymë pozitive në pushimin për shkak të ndeshjeve të përfaqësueseve.

Xhiroja e tretë mbyllet të hënën me ndeshjen Llapi – Drita. Llapi e kërkon fitoren e parë, pas një barazimi dhe një humbjeje. Edhe Drita humbi në xhiron e parë, ndërsa ndeshjen e xhiros së dytë nuk e zhvilloi për shkak të angazhimit në Evropë. Kampionia e Kosovës ka arritur sukses historik duke u kualifikuar në fazën e ligës në “Conference League”. Tani i kthehet garës kampionale me synim për fitore.