Jesus Navas është pensionuar nga Përfaqësuesja e Spanjës, pas 15 vjetësh.
Lajmin e ka bërë të ditur vetë futbollisti në llogarinë e tij zyrtare në platformën “X”, të enjten gjatë ditës.
Navasi së fundmi e fitoi Evropianin 2024 me Spanjën, dhe ishte i vetmi futbollist në ekip, nga skuadra që e fitoi edhe Kupën e Botës 2010.
38-vjeçari që luan te Sevilla, ishte titullar në fitoren e Spanjës kundër Francës në gjysmëfinale të “Euro 2024”. Ishte edhe paraqitja e tij e fundit për shtetin e tij. Ai debutoi në vitin 2009, ndërsa e fitoi edhe Evropianin 2012.
“Kujtimet do të mbesin gjithmonë me mua, njësoj si krenaria që kam bërë kaq shumë njerëz të lumtur. Por kësaj radhe, selektori Luis de la Fuente nuk do të më ftojë. Ciklit që nisi 15 vjet më parë i erdhi fundi. Ishin vite të mbushura me kënaqësi, krenari dhe emocione”, ka shkruar Navas.
Navas po ashtu ka bërë të ditur se ky do të jetë edicioni i fundit me Sevillan, pasi do t’i jap fund karrierës në fund të sezonit.