Sulmuesi i Kosovës, Vedat Muriqi, pritet të kthehet në fushë në ndeshjen që skuadra e Mallorcas e luan në fundjavë kundër Rayo Vallecanos, skuadër së cilës i ka shënuar pesë gola, shkruan “AS” të martën.
“Muriqi është përballur katër herë me skuadrën e Vallecanos dhe ka shënuar pesë gola. Në edicionin 2021/2022, Mallorca fitoi 2:1 dhe Muriqi shënoi një nga dy golat e fitores. Në sezonin 2022/2023 kosovari shënoi kundër Rayos në dy ndeshjet e ligës, në fitoren 2:0 dhe 3:0. Dhe sezonin e kaluar ai nuk ai shënoi dy gola në barazimin 2:2 ndaj Vallecanos”, shkruan “AS”.
Muriqi kishte debutuar pikërisht ndaj Vallecanos në Spanjë. Ishte ndeshja çerekfinale e “Copa del Rey”, ndërsa Mallorca humbi 1:0 me golin e Oscar Trejos nga penaltia që e dërgoi Vallecanon në gjysmëfinale.
Te Mallorca janë të bindur se Muriqi është rikuperuar plotësisht nga lëndimi dhe do të jetë në fushë prej minutës së parë të ndeshjes.
Muriqi shkaku i dëmtimit të muskulit në stërvitje i ka munguar Mallorcas në tri ndeshjet e fundit kampionale dhe po ashtu nuk është grumbulluar me Kombëtaren e Kosovës për ndeshjet e këtij muaji ndaj Lituanisë dhe Qipros në Ligën e Kombeve.
30-vjeçari javën e shkuar i është bashkuar pjesës tjetër të ekipit në stërvitje dhe sipas të gjitha gjasave do t’i prijë sulmit të Mallorcas ndaj Vallecanos.
Edhe
Muriqi i gatshëm për ndeshjen ndaj Espanyolit
Ndeshja në mes të Mallorcas dhe Rayo Vallecano luhet të dielën prej orës 14:00 dhe i takon xhiros së dhjetë të elitës së futbollit spanjoll.
Muriqi, 30-vjeçar, në edicionin aktual ka realizuar një gol dhe ka kontribuar me një asistim në gjashtë ndeshje në La Liga. Mallorca zë vendin e shtatë në tabelë me 14 pikë të mbledhura.
