-
Nga:
Arsim Maxhera
- 25 shtator 2026 15:25
- Shpërndaje në:
Mediumet në Serbi, por edhe në vendet e regjionit, i kanë kushtuar rëndësi të madhe festës së Vedat Muriqit dhe lojtarëve tjerë të Kosovës në fitoren 1:0 ndaj Irlandës.
Pasi e shënoi golin e fitores në minutën e 83-të, kapiteni “dardan” ngriti larg një fanellë ku shkruante “DREJTËSI PËR ÇLIRIMTARËT” dhe “JO NË EMRIN TIM”. Atij i janë bashkuar edhe lojtarët e tjerë. Veprimi i Muriqit me shokë solli edhe më shumë entuziazëm në stadiumin “Fadil Vokrri” në Prishtinë.
Por, ashtu si pritej, u ka penguar mediave serbe.
Të gjitha mediumet serbe kanë shkruar për festën në stadiumin e mbushur me shikues në Prishtinë.
Mediumi anti-shqiptar, “Kurir”, madje ka kërkuar largimin e Kosovës nga futbolli evropian. “Kurir” shpesh del me shkrime që nuk kanë të bëjnë asgjë me realitetin.
“Shteti i rrejshëm i Kosovës duhet të largohet nga futbolli evropian”, është titulli i shkrimit të mediumit “Kurir”.
Në frymë të njëjtë janë edhe shkrimet e shumicës së mediumeve serbe. “Alo” ka pyetur nëse do të reagojë UEFA.
Mediumit tjetër serb, “Telegraf”, i ka penguar edhe një postim i trajnerit të Kosovës në xhudo, Driton Kuka. Ai ka publikuar fotografinë e Muriqit e Milot Rashicës, ndërsa ka vlerësuar fitoren e Kosovës.
“Ekip i shkëlqyeshëm. Pamja në fund të ndeshjes flet shumë. Gjenerata të lirisë. Gjenerata që nuk lejojnë robëri kurrë më”, ka shkruar Kuka.
Dhe postimi i trajnerit më të suksesshëm shqiptar është pritur rëndë nga mediumi serb.
Ndërkohë mediumet në Kroaci dhe Bosnjë-Hercegovinë kryesisht janë marrë me reagimet e mediumeve serbe lidhur me festën në Kosovë.
“Serbët të tërbuar nga mesazhi nga Kosova: ‘Përjashtojini nga futbolli evropian’”, është titulli i shkrimit të mediumit kroat, “Dnevnik”.
“Veprimi i Muriqit do ta ‘ndezë’ Serbinë”, shkroi mediumi boshnjak “sportsport.ba”.
Ka bërë bujë edhe deklarata e Muriqit pas ndeshjes. Ai ua ka kushtuar fitoren çlirimtarëve dhe udhëheqësve të UÇK-së.