-
Nga:
Faton Polisi
- 18 korrik 2024 15:05
- Shpërndaje në:
Zakonisht vendimet e legjendës gjermane të futbollit Ottmar Hitzfeld kanë qenë të drejta. I tillë ishte edhe vendimi kur në vitin 2010 ia dha mundësinë Xherdan Shaqirit të debutojë për Zvicrën me 18 vjet e katër muaj e 21 ditë. Më 3 mars të vitit 2010, Shaqiri debutoi për Zvicrën. Luajti 45 minuta në fitoren 3:1 ndaj Uruguait. Nuk shkoi larg, Hitzfeld e përfshiu Shaqirin në ekipin helvetik për Kupën e Botës “Afrika e Jugut 2010”. Vendimi i Hitzfeldit për disa ishte befasues. Por Hitzfeld i besoi intuitës së tij.
Në Botërorin e vitit 2010, Shaqiri ishte shfrytëzuar vetëm 13 minutat e fundit në ndeshjen e fundit në grup ndaj Hondurasit, ndeshje e cila u mbyll pa gola.
Hitzfeld pati thënë fjalë të mëdha pas ndeshjes debutuese të Shaqirit. Edhe të enjten për KOHËN, Hitzfeld foli me superlativ për Shaqirin, i cili të hënën njoftoi për tërheqjen nga Zvicra pas plot 14 vjetësh të suksesshme të kaluara në përfaqësuese.
Shaqiri kishte karrierë impresive me përfaqësuesen, ndërsa është i vetmi lojtar që ka shënuar gola në gjashtë ngjarjet e fundit të mëdha, tre botërorë e tre evropianë.
“Ai është lojtar i madh”, ka thënë Hitzfeld për KOHËN. Ai udhëhoqi ekipin helvetik drejt Kampionatit botëror 2010 dhe siguroi pjesëmarrjen në Botërorin 2014, kurse dështoi të kualifikohej për në “Euro 2012”.
Edhe
Shaqiri tregon se e kishte shqyrtuar seriozisht paraqitjen për Kosovën
Hitzfeld ka thënë për Shaqirin se është lojtar i shkëlqyeshëm, por i vjen keq që nuk e ka treguar gjithë potencialin që ka.
Ai kujton edhe disa prej golave të rëndësishëm të Shaqirit. Përmend “hat-trickun” në Botërorin 2014 kundër Hondurasit, që sipas tij jo shumë lojtarë kanë realizuar tre gola në një ndeshje Botërori.
Falë tregolëshit të tij, Zvicra pati avancuar në raundin e dytë, ku u përball me Argjentinën. Zvicra ishte eliminuar me golin e shënuar nga Angel di Maria në minutën e 118.
Hidzfeld e përshkruan si lojtar inteligjent Shaqirin.
“Është lojtar shumë inteligjent, shënues i mirë me gjuajtje fenomenale të kualitetit superior”.
Shaqiri gjithnjë do të kujtohet për golat e tij të bukur. Ndër ta ishte edhe kundër Polonisë në një të tetën e finales në “Euro 2016”. Ishte minuta e 82-të kur Shaqiri u shkëput dhe me goditje “gërshërë” dërgoi topin në rrjetë. Ai shënoi për 1:1. Goli i ëndrrave është shfaqur vazhdimisht në televizione. Bëhet fjalë për golin më të mirë të atij Evropiani.
Edhe
Shaqiri mund të kthehet në “Fadil Vokrri”, por vetëm si shikues
Ndër momentet e veçanta të Shaqirit, ishte edhe goli i qershorit të vitit 2018, në ndeshjen kundër Serbisë në Botërorin “Rusia 2018”. Pas golit, Shaqiri festoi me figurën e shqiponjës.
Shaqiri luajti për Zvicrën edhe në “Euro 2024”, që të dielën përfundoi në Gjermani. Shënoi gol ndaj Skocisë në fazën e grupeve. Ishte supergoli i radhës i tij. Më pas qëlloi traversën nga korneri ndaj Anglisë dhe realizoi penallti. Por nuk mjaftoi që Zvicra ta kalonte çerekfinalen e Evropianit.
“Ai mund ta kuptojë lojën dhe teknika e tij është fantastike”, thotë Hidzfeld.
Por Hidzfeld ka diçka që edhe sot nuk pajtohet. Ai nuk e arsyeton largimin e Shaqirit nga Bayern Muencheni në drejtim të Interit në vitin 2015.
Megjithatë, Hitzfeld vlerëson personalitetin e Shaqirit.
Edhe
Shaqiri kujton me emocione të kaluarën e pasur si futbollist
“Dhe mbi të gjitha është njeri i mrekullueshëm”, është shprehur Hitzfeld. Shaqiri është prej më meritorëve, nëse jo më meritori, që Zvicra është bërë përfaqësuese serioze evropiane. Tani Zvicra paraqitet rregullisht në kampionate evropiane e botërore, ndërsa kalimi i grupit as që diskutohet.
Nuk ka diskutim as dashuria që kanë për të dy popujt, zviceranët dhe shqiptarët.
