Huliganët polakë në Novi-Pazar, fyejnë Kosovën e shqiptarët

Klubi i futbollit Novi Pazari po bëhet gati për debutim në gara evropiane. Novi Pazari është klub nga qyteti me emrin e njëjtë, i banuar kryesisht me boshnjakë dhe në afërsi të kufirit me Kosovën. Novi Pazari ka siguruar daljen në Evropë duke përfunduar në vendin e tretë në Superligën e Serbisë në futboll, që ishte sukses historik për klubin, në të cilin në të kaluarën kanë luajtur shumë futbollistë shqiptarë.

Novi Pazari përballet me skuadrën polake, Jagiellonia Bialystok, në raundin e dytë kualifikues të Ligës së Konferencës. Ndeshja e parë zhvillohet të enjten nga ora 19:00 në stadiumin e qytetit në Novi Pazar.

Jagiellonia vjet arriti deri në çerekfinale të Ligës së Konferencës dhe llogaritet favorite përballë Novi Pazarit. Udhëtimin në qytetin në afërsi të Kosovës e kanë paralajmëruar edhe tifozët, përkatësisht huliganët polakë.

Si shumë grupe huliganësh në Poloni, edhe përkrahësit e Jagiellonias kanë qëndrim anti-Kosovë. Këtë e kanë bërë të qartë edhe në postimin paralajmërues për udhëtimin në Sanxhak.

“Do të shkojmë në një nga pikat më të paqëndrueshme në Ballkan – në një vend për të cilin vetë serbët turpërohen. Novi Pazari është një qytet mysliman, që me 82 për qind është enklava e tyre më e madhe në të gjithë vendin. I vendosur pranë Kosovës së vjedhur, është i banuar nga njerëz që simpatizojnë Bosnjën, Turqinë dhe Shqipërinë”, shkruan në postimin e tifozëve të Jagiellonias, të bërë në rrjetet sociale. 

Postimi është shoqëruar me një fotografi ku shkruan “Kosova është Serbi”, me flamurin e Serbisë mbi hartën e Kosovës dhe me një X mbi flamurin shqiptar.

Ky grup huliganësh ka shkruar se udhëtimi nuk është për “individualistë, turistë dhe ëndërrimtarë”. 

Ka pasur komente përkrahëse ndaj postimit, por edhe komente që kanë vlerësuar paralajmërimin si provokim dhe thirrje për incidente.

Mbështetësit e Jagiellonias në të kaluarën kanë shpalosur banerë, ku është shkruar “Kosova është Serbi”.

Për dallim nga huliganët polakë, tifozët e Novi Pazarit shpesh kanë bërë thirrje në përkrahje të Kosovës. Madje edhe në derbit e mëdhenj me skuadrat nga Beogradi si Cërvena Zvezda e Partizani.

Në ndeshjen e së enjtes stadiumi do të jetë i stërmbushur me shikues, ndërsa përkrahja për Novi Pazarin shumë e madhe. Nuk përjashtohet mundësia e ndonjë incidenti me huliganët polakë.

Biletat janë shitur për kohë rekorde, ndërsa ka nisur edhe shitja e tyre në treg të zi, për çka Novi Pazari ka tërhequr vërejtjen. Klubi po ashtu ka bërë thirrje që të respektohen rregullat për të shmangur dënimet nga UEFA.

Ndeshja në Novi-Pazar ka potencial të jetë më e “nxehta” e kësaj jave në skenën evropiane.