Tifozët e futbollit kanë përjetuar moment frike në ndeshjen e kategorisë së dytë të futbollit të Shqipërisë, Besëlidhja – Korabi.
Futbollisti që ka paraqitje edhe me Shqipërinë, Lorenc Trashi, është rrëzuar në fushën e lojës. Stafi mjekësor ka ndërhyrë menjëherë, ndërsa ndeshja u ndërpre për afro gjashtë minuta, ka raportuar të shtunën “Panorama Sport”.
Trashi, që është futbollist i Besëlidhjes, është larguar me ambulancë nga fusha. 34-vjeçari më parë ka luajtur edhe në Kosovë te Ballkani.
Dueli xhiros së dytë i zhvilluar të shtunën, përfundoi 2:1 në të mirë të Korabit.
Besëlidhja në faqen zyrtare nuk ka dhënë detaje për gjendjen shëndetësore të Trashit. Ka shkruar vetëm për rezultatin përfundimtar të ndeshjes.