FIFA edhe zyrtarisht ka njoftuar se Chelsea është ekipi i parë që e ka fituar Kupën e Botës për Klube, pas triumfit në New Jersey të dielën mbrëma.
“Blutë” mposhtën fituesin e Ligës së Kampionëve, Paris Saint-Germainin, me shkëlqimin e Cole Palmerit, që shënoi dy gola dhe asistoi në një tjetër.
Megjithatë, suksesi i londinezëve kishte ndikim edhe pas ndeshjes, shkruan “Daily Mail” të shtunën, pasi fituesit e mëparshëm të Botërorit të klubeve tani njihen si kampion interkontinental.
Kështu, ekipet e njohura si Liverpooli, Manchester City, Manchester Unitedi, Real Madridi dhe Barcelona, nuk janë më kampionë të botës, shkruan tutje mediumi i njohur anglez.
Kjo garë për herë të parë është mbajtur në vitin 2000 si Kampionati Botëror i klubeve, ndërsa më pas u mbajt sërish në vitin 2005 dhe u organizua çdo vjet, deri në vitin 2023.
Në këtë edicion që u organizua në SHBA, turneu ishte me format të ri, me 32 klube për herë të parë.
Më herët ishte organizuar me gjashtë e me tetë klube.
Real Madridi e ka fituar trofeun e kësaj gare pesë herë, së fundmi në vitin 2022, ndërsa Barcelona është katër herë fituese. Chelsea, Corinthiansi dhe Bayern Munichu janë dy herë fitues të këtij turneu.
