Donat Rrudhani ka ndryshuar skuadër, por ka mbetur në Superligën e Zvicrës në futboll.
Lojtari i krahut të majtë është transferuar nga Young Boysi te Sioni. Me Sionin ka firmosur kontratë për katër vjet, të vlefshme deri në vitin 2029.
26-vjeçari Rrudhani nuk ka mundur të stabilizohet tek Young Boysi dhe për këtë arsye ka vendosur për klub të ri. Pjesë e Young Boysit ishte nga viti 2022, por kishte periudha huazimi te Lausanne-Sport dhe së fundi te Luzerni. Ka luajtur edhe për Aaraun tri vjet dhe për disa skuadra më të vogla zvicerane. Karrierën e ka nisur në Francë.
Rrudhani i ka 16 ndeshje e dy gola për Kosovën. Por për ndeshjet e shtatorit është vetëm në listën rezervë.
I ka kushtuar mungesa e paraqitjeve në nivel klubesh. Në edicionin e kaluar në 30 ndeshje për Luzernin i shënoi nëntë gola dhe i bëri gjashtë asistime. Këtë edicion nuk ka luajtur ende.
Sioni e ka prezantuar si lojtar që mund të luajë në qendër dhe në krahë. Te Sioni presin nga Rrudhani kreativitet, vizion dhe aftësi të shënimit të golave.
“Donati është lojtar i kompletuar. Punon fort dhe është ambicioz. Ai e njeh ligën zvicerane mirë dhe ka treguar gjëra të mëdha te Luzerni. Profili i tij përshtatet në mënyrë të përkryer me atë që e kemi kërkuar për mesfushën tonë”, ka thënë Barthelemy Conctantin, drejtor sportiv i Sionit.
Menjëherë të premten Rrudhani u bashkua me skuadrën.
“Jam shumë i lumtur që i bashkohem një klubi si Sioni. Kam ndier përkrahje nga menaxhmenti dhe kam vërejtur se projekti është i duhuri. Skuadra më ka pritur në mënyrën më të mirë të mundshme dhe mezi pres të vë aftësitë e mia në dispozicion të ekipit”, ka thënë Rrudhani.
Kreshnik Hajrizi, Benjamin Kololli, Rilind Nivokazi e Altin Shala janë te Sioni.
Sioni e ka nisur edicionin në Zvicër me dy fitore e një barazim. Pritet të luftojë për pjesën e epërme të tabelës.