Manchester City është futur në garë për transferimin e mbrojtësit të Crystal Palacet, Marc Guehi. City dëshiron ta blejë kartonin e Guehit në afatin kalimtar të dimrit, shkruan të martën “BBC”.
Interesimi për Guehin vjen pas lëndimeve të mbrojtësve Joshko Gvardiol dhe Ruben Dias.
Dy mbrojtësit kryesorë të Cityt u lënduan të dielën në barazimin 1:1 ndaj Chelseat. Gjithashtu i lënduar është edhe qendërmbrojtësi anglez, John Stones.
“Kemi shumë lëndime. John Stones mungon për nuk e di sa muaj. Ruben tani do të jetë jashtë, Joshko do të jetë jashtë. Nathan Ake nuk mund të luajë rregullisht. Kjo është situata”, kishte deklaruar trajneri i Cityt, Pep Guardiola, pas ndeshjes ndaj Chelseat.
Për reprezentuesin e Anglisë, Guehi, kanë shprehur interesim edhe disa skuadra të mëdha si Bayern Munich, Real Madrid, Barcelona, Inter dhe Atletico Madrid.
25-vjeçari Guehi është pjesë e Palacet nga viti 2021, kur ishte transferuar nga Chelsea për 23 milionë euro.