Londër, 24 nëntor – Chelsea – Barcelona është prej ndeshjeve kryesore në xhiron e pestë të fazës së ligës në Champions. Kjo ndeshje zhvillohet të martën prej orës 21:00 në “Stamford Bridge”, në Londër.
Të dy skuadrat e mëdha e kërkojnë fitoren e tretë në Ligën e Kampionëve. Aktualisht kanë bilanc prej dy fitoreve, një humbjeje e një barazim. Me nga shtatë pikë, Barcelona është e 11-a, ndërsa Chelsea i 12-i. Këto pozita dërgojnë në fazën nokaut, por jo direkt në një të tetën e finales.
Dhe të dy skuadrat kanë pretendime të shmangin plejofin e fazës nokaut. Rrjedhimisht ndeshja pritet të jetë e fortë dhe shumë interesante.
Në xhiron e kaluar londinezët dëshpëruan duke luajtur vetëm 2:2 në udhëtim te Qarabagu në Azerbajxhan. Rezultat dëshpërues kishte edhe Barcelona, që luajti 3:3 në udhëtim te Club Brugge në Belgjikë.
Në Premier League, Chelsea është i dyti me 23 pikë, gjashtë më pak se Arsenali. Pas barazimit me Qarabagun më 5 nëntor, Chelsea fitoi 3:0 ndaj Wolvesit dhe 2:0 ndaj Burnleyt në Premier League.
Edhe
Barcelonën e pret ndeshje sfiduese në Angli
“Është javë e madhe. Nesër luajmë me Barcelonën e të dielën me Arsenalin në Premier League. Të dy ndeshjet janë të rëndësishme për arsye të ndryshme, por është me rëndësi që ndeshjet t’i marrim një nga një”, ka thënë trajneri i Chelseat, Enzo Maresca.
Tekniku i londinezëve e di se ku Barcelona është e fortë.
“Duhet të jemi të kujdesshëm kur nuk e kemi topin. Barcelona krijon shumë raste dhe gjithnjë shënon gola. Duhet të gjejmë balancën e duhur në mes të sulmit dhe mbrojtjes”, ka theksuar Maresca.
Ndeshja me Barcelonën do të jetë e veçantë për Marc Cucurellan, mbrojtësin e Chelseat të zhvilluar në Akademinë e Barcelonës.
Detyra e Cucurellas pritet të jetë që ta ndalë Lamine Yamalin.
Edhe
Top-ndeshje të Championsit të mërkurën mbrëma
“Është ndeshje e veçantë për mua dhe për familjen time. Kam luajtur kundër Barcelonës shumë vjet më parë, si pjesë e Eibarit, por tani e kam mundësinë të luaj kundër saj në Ligën e Kampionëve. Ndeshja mes Chelseat dhe Barcelonës ka qenë gjithnjë shumë e mirë. Shpresoj se do të jetë ndeshje e mirë dhe do të fitojmë tri pikë”, ka thënë Cucurella.
Barcelona është në seri të tri fitoreve në La Liga. Më 9 nëntor fitoi 4:2 në udhëtim ndaj Celta Vigos, ndërsa të shtunën fitoi 4:0 në shtëpi ndaj Athletic Bilbaos.
Në La Liga, tani Barcelona është vetëm një pikë prapa Real Madridit. Madridi është i pari me 32 pikë, ndërsa Barcelona e dyta me 31.
Të martën mbrëma janë edhe disa ndeshje interesante. Prej skuadrave të mëdha, Manchester City e pret Bayer Leverkusenin, ndërsa Juventusi luan në Norvegji ndaj Bodo/Glimtit. Edhe këto ndeshje janë prej orës 21:00. Në këtë termin luhen edhe ndeshjet Dortmund – Villarreal, Marseille - Newcastle, Napoli – Qarabag e Slavia Praga – Athletic Bilbao.
Barça para testit më të vështirë, Bayerni sfidon Arsenalin
Vetëm tri skuadra kanë pikë maksimale pas katër xhirove në fazën e ligës – Bayern Muncheni, Arsenali e Interi. Manchester City është i katërti në tabelë me 10 pikë. Pasojnë PSG-ja, Newcastle Unitedi, Real Madridi, Liverpooli e Galatasaray me nga nëntë pikë.
Faza e ligës përbëhet nga tetë xhiro. Tetë skuadrat e para avancojnë në një të tetën e finales. Skuadrat prej vendit të nëntë e deri në vendin e 24-t avancojnë në plejofin e fazës nokaut. Ndërkohë skuadrat prej vendit të 25-të deri në vendin e 36-të eliminohen.
