Barcelona do të përpiqet ta lërë pas zhgënjimin e Ligës së Kampionëve.
Barça të martën u mposht në “Stamford Bridge” nga Chelsea me rezultatin 3:0, në kuadër të xhiros së pestë të fazës së ligës.
Barça tashmë vëmendjen e ka te ndeshja e së shtunës ndaj Deportivo Alavesit.
Gjiganti katalunjas nga ora 16:15 e pret Alavesin në kuadër të xhiros së 14-të të La Ligas.
Javën e kaluar Barça u kthye në “Camp Nou” me fitore 4:0 ndaj Athletic Bilbaos. Stadiumi i Barçës është ende duke u rinovuar. Me Alavesin, Barcelona luan sërish në “Camp Nou”.
Dështimi i Real Madridit xhiron e kaluar, Barçës ia mundësoi që t’i afrohet vendit të parë në tabelë në vetëm një pikë.
Reali barazoi 2:2 me Elchen në udhëtim. Klubi mbretëror i prin tabelës me 32 pikë.
Alavesi ka 15 pikë në vendin e 14-të.
Barcelona ka tri fitore radhazi në elitë, kurse Alavesi ka tri humbje në pesë ndeshjet e fundit.
Barcelona ka fituar 14 nga 16 ndeshjet e fundit kundër Deportivo Alaves në të gjitha garat.
Barçës vazhdojnë t’i mungojnë portieri Marc-Andre ter Stegen dhe mesfushori Gavi, kurse Pedri do të jetë në dispozicion për ndeshje.
Fitorja e fundit e Alavesit ndaj Barcelonës ishte në vitin 2016.
Ndërkohë Reali të dielën nga ora 21:00 luan në udhëtim te Girona.
Girona ka dëshpëruar me rezultate këtë edicion. Është në pozitën e 18-të me 11 pikë. Ka mbrojtjen më të dobët deri më tani në kampionatin spanjoll.
Reali ka fituar katër nga pesë ballafaqimet e fundit ndaj Gironas.
“Los Blancos” të mërkurën fituan ndaj Olympiacosit me rezultatin 4:3, në “Champions”. Të katër golat i realizoi Kylian Mbappe, që është edhe golashënuesi më i mirë deri më tani në La Liga.