Mbështete KOHËN. Ruaje të vërtetën
EXPRESS

Njeriu para lindjes në rrëfimin dramaturgjik

Një protagoniste, e cila beson në jetën pas lindjes dhe tjetri që është skeptik për ekzistimin e një bote tjetër, frymojnë brenda barkut të nënës së tyre. X dhe Y janë qenie të padefinuara me emër, mirëpo jo edhe me mendime.

Brenda kopertinës së dramës “Rrënjë” të Ulpianë Malokut, ata bëhen dëshmitarë të shpresës për nënën e tyre dhe të dyluftimit ekzistencial.

“Janë tri personazhe, mirëpo, një personazh që është nëna, Nija, ajo vetëm dëgjohet si zë, nuk e shohim asnjëherë. Kurse dy binjakët X dhe Y gjenden në barkun e nënës së tyre dhe dëgjojnë gjithçka që iu transmetohet nga nëna e tyre, prej jashtë brenda. Këtu lind njëfarë konflikti mes këtyre dyve, X beson që gjithçka është reale në jetën pas lindjes, mirëpo Y nuk e beson. Kështu që, qëllimi i X është ta bind Y. Është një raport mes lindjes, vdekjes edhe jetës, që jam përpjekë ta paraqes në një formë sureale”, ka thënë Maloku.

Kjo dramë hyn artistikisht në shinat e një bote ndryshe nga ç’jemi mësuar ta dëgjojmë.

“Edhe në jetën tonë të përditshme e flasim jetën pas vdekjes, mirëpo unë e kam transferuar këtë në atë se çka nëse ndalemi dhe mendojmë për ata që janë duke u krijuar, dhe sa ata besojnë në jetën pas lindjes”, është shprehur ajo.

Një ndër motivet e dramës është edhe ai i gruas së fuqishme, e cila pavarësisht sfidave me të cilat përballet, sërish bart mbi supe kujdesin e një nëne.

“Nija përveç dramës që ne e shohim në tekst, ne e kuptojmë përmes zërit se ajo është duke e jetuar një dramë tjetër jashtë, të cilën mundohet të mos e transmetojë te krijesat e saj të vogla për shkak se gjithçka transmetohet. Ajo është mes luftës se si t’i ruajë krijesat e saj dhe t’i përballojë sfidat jashtë botës së këtyre dy krijesave”, ka shpjeguar më tej Maloku.

Edhe “Nyga” me dhimbjen dhe mohimin përballë humbjes së kujtesës Kulturë “Nyga” me dhimbjen dhe mohimin përballë humbjes së kujtesës

Dramaturgia Maloku nuk dëshiron të flasë për emërtimin e veprës në mënyrë që simbolika e saj të kuptohet nga çdo lexues në formën e vet. Ndërkaq, për dizajnin e kopertinës ajo thotë se ka paraqitur dy krijesa që vallëzojnë brenda barkut të nënës.

“Është një situatë dramatike se mungesa e ushqimit të Nijes ndikon drejtpërdrejt te personazhet brenda, ata me një situatë të skajshme se si sillen dhe çka janë në gjendje me bë, duke iu kundërvënë njëri-tjetrit. Fundin nuk dua ta tregoj veçse është një fund tragjik, është pak i dhimbshëm....” ka përfunduar ajo.

“Rrënjë” si një botim i përkrahur nga Komuna e Prishtinës pritet shumë shpejt të promovohet. X dhe Y, dy protagonistët kryesorë të dramës, do të dalin nën dritën e publikut përmes një leximi skenik.