1 perditesime
15:17

Arnautoviq i kërkon falje futbollistit shqiptar të Maqedonisë, Alioskit

Sulmuesi i Austrisë, Marko Arnautoviq, i ka kërkuar falje futbollistit shqiptar të Maqedonisë së Veriut, Ezgjan Alioski, pas fyerjeve që i bëri ndaj këtij të fundit në ndeshjen e djeshme të Euro 2020.

Arnautoviq përmes një postimi në Instagram ka thënë se fyerja ndodhi ‘’në emocion e sipër’’.

“Dje përdora disa fjalë të rënda në emocion e sipër, për ato fjalë unë dua të kërkoj falje, sidomos për miqtë e mi në Maqedoninë e Veriut dhe Shqipëri. Dua ta them një gjë shumë qartë: Nuk jam racist! Kam shokë pothuajse në të gjitha vendet e botës dhe mbështes shumëllojshmërinë. Të gjithë që më njohin e dijnë këtë gjë”.

Në fund, ai e mbylli me një mesazh në gjuhën maqedonase dhe shqipe, duke thënë “Më falni”.

12:15

Arnautoviqi e shau në gjuhën serbe futbollistin shqiptar Ezgjan Alioski

Sulmuesi i Austrisë, Marko Arnautoviq, ka shara në gjuhën serbe futbollistin shqiptar të Maqedonisë së Veriut, Ezgjan Alioski, pas golit të tretë që shënoi të dielën në fitoren 3:1 të Austrisë në kuadër të Euro 2020, raporton Index.hr.

Në të vërtetë këto sharje ishin edhe arsye pse erdhi deri te një konfrontim mes dy futbollistëve pas përfundimit të ndeshjes, por situata u qetësua.

Arnautoviq, që e ka babanë serb, iu drejtua Alioskit në gjuhën serbe i bindur se do ta kuptonte, duke e sharë e po ashtu duke përdorur fyerje raciste. 

Kapiteni i Austrisë, David Alaba, shkoi te Arnautoviq për ta ndaluar atë dhe e kapi për nofulle. Dhe vetëm kur ndaloi fyerjet ia lëshoi nofullën.

Për Maqedoninë e Veriut ndeshja e të dielës ishte debutim në Euro 2020. Te Maqedonia e Veriut titullar ishin Visar Musliu, Ezgjan Alioski, Enis Bardhi e Arijan Ademi. Ndërkohë nga minuta e 63-të u aktivizua Egzon Bejtulai.